पार्टी एकताबारे माओवादी ‘हल्ला’ मा नपर्न अर्यालको आग्रह

काठमाडौँ । नेकपा (एकीकृत समाजवादी)का पोलिटब्युरो सदस्य तथा केन्द्रीय प्रचार विभाग उपप्रमुख दामोदर अर्यालले माओवादी केन्द्रसँगको पार्टी एकता हल्ला मात्र भएको बताएका छन् ।

माओवादीबाट एकता हुँदैछ भन्ने हल्ला गरिएपनि त्यस्तो हल्लामा नपर्न पार्टी कार्याकर्ताहरुलाई अर्यालको अनुरोध छ । पार्टीको शुक्रबार बसेको सचिवालय बैठकले वाम पार्टीसँग सहकार्यमात्र गर्ने र समाजवादी मोर्चालाई थप मजबुत बनाउने निर्णय भएको स्पष्ट पारेका छन्  ।

‘हाम्रो पार्टीको हिजो बसेको सचिवालय बैठकले विभिन्न वाम पार्टीहरूसँग सहकार्य गर्ने र समाजवादी मोर्चालाई थप मजबुत बनाउने निर्णय गरेको हो’, सामाजिक सञ्जालमा अर्यालले लेखेका छन्,‘त्यसबाहेक हाम्रो पार्टीको सङ्गठन निर्माण र आन्दोलनका सम्बन्धमा आवश्यक अन्य महत्त्वपूर्ण निर्णय पनि गरेको छ । ’

उनले थप भनेका छन्, ‘यतिखेर अरू वाम पार्टीहरूसँग पार्टी एकता गर्ने पार्टी सचिवालयले कुनै पनि निर्णय, योजना र मनसाय प्रकट गरेको छैन ।तसर्थ, पार्टी एकता हुदैछ भन्ने प्रकारको माओवादी हल्लामा नपर्न सम्पूर्ण कमरेडहरूलाई अनुरोध गर्दछु ।’

अरू वाम पार्टीहरूसँग पार्टी एकता गर्ने पार्टी सचिवालयले कुनै पनि निर्णय, योजना र मनसाय प्रकट नगरेको पनि अर्यालको भनाइ छ ।