'हरेकदिन २५ सय मानिस विदेशिन्छन्, यही हो बहुदलीय जनवाद ?' : झलनाथ खनाल

काठमाडौं । नेकपा (एकीकृत समाजवादी)का सम्मानित नेता झलनाथ खनालले अहिलेको सरकारले जनताको हितमा कमिलोसम्म पनि मार्न नसकेको टिप्पणी गरेका छन् । बुधबार कीर्तिपुरमा आयोजित ४७औँ पुष्पलाल स्मृति दिवस कार्यक्रममा उनले सरकारमा दुई ठूला पार्टी भए पनि जनताको पक्षमा केही गर्न नसकेको आरोप लगाए ।

“दुईवटा हात्तीजस्ता पार्टीहरू छन्, सत्तामा । तर, कमिलो पनि मार्दैनन्,” उनले भने ।

उनले देशका क्षेत्रमा व्याप्त भ्रष्टाचार रहेको र भ्रष्ट व्यक्तिहरू शासनमा पुगेको बताए । “जबसम्म भ्रष्टाचार उन्मूलन गर्ने अभियान एउटा आँबीबेहरी ल्याउन सकिँदैन, तबसम्म यो देशका जनताले हक पाउने कुनै सम्भावना छैन,” उनले भने ।

उनले बहुदलीय जनवाद र पुँजीवादी प्रणालीले देशलाई दलाल पुँजीवादतर्फ धकेलेको बताए । “हरेक दिन २५ सय मानिस विदेश जाँदैछन्, पाँच जनाको शव बाकसमा फर्किन्छ । यही हो बहुदलीय जनवादले गरेको काम ?”