इजरायली सेनाको आक्रमणमा ६७ जनाको मृत्यु

एजेन्सी । इजरायली सेनाको गोलीबारीमा उत्तरी गाजामा कम्तीमा ६७ जना मारिएका छन् । संयुक्त राष्ट्रसंघको राहत सामग्री बोकेका ट्रकहरूको प्रतिक्षा गरिरहेका ६७ जना मारिएका गाजामा हमासद्वारा सञ्चालित स्वास्थ्य मन्त्रालयले जनाएको छ । 

संयुक्त राष्ट्र विश्व खाद्य कार्यक्रमले खाद्यान्न बोकेका २५ वटा ट्रक इजरायलबाट प्रवेश गरेर चेकपोइन्टहरू पार गरेपछि ट्रकतर्फ भोकमरीबाट पीडित रहेका नागरिकहरूको ठूलो भीड आएको थियो । त्यही भीडमा गोलीबारी भएको बताइएको छ । 

इजरायल डिफेन्स फोर्सेस (आईडीएफ)ले उसले वर्तमान खतरालाई रोक्न चेतावनीको रूपमा गोली चलाएको बताएको बीबीसीले जनाएको छ । उसले सार्वजनिक भएका मृत्युको तथ्यांकमाथि प्रश्न उठाएको समाचारमा उल्लेख छ ।

मन्त्रालयले बताएअनुसार गाजाको अन्य भागहरूमा सहायता पर्खिरहेका थप ६ जनाको पनि इजरायली आक्रमणमा मृत्यु भएको छ । १५० भन्दा बढी व्यक्ति घाइते भएका छन । घाइतेमध्ये केहीको अवस्था गम्भीर छ ।

शनिबार मन्त्रालयले गाजामा भोकमरी तीव्र रूपमा बढिरहेको र ठूलो संख्यामा मानिसहरू उसका केन्द्रहरूमा अत्यन्त थकान र कमजोरीको अवस्थामा पुगिरहेका बताएको थियो ।