चीनमा डुङ्गा पल्टिँदा ९ जनाको मृत्यु, एक जना अझै बेपत्ता

बेइजिङ । दक्षिण पश्चिम चीनमा डुङ्गा पल्टिँदा कम्तीमा नौ जनाको मृत्यु भएको छ । अरू ७० जनालाई अस्पतालमा भर्ना गरेर राखिएको बताइएको छ । तीव्र हुरीका कारण गुइझाउको छिन्सी सहरमा आइतबार पर्यटकहरू सवार डुङ्गा पल्टिँदा ८४ जना नदीमा खसेको भन्दै सरकारी सञ्चारमाध्यमले समाचार छापेको छ । यस क्रममा एक दर्जनभन्दा धेरै मानिसहरू बेपत्ता भएका भएका थिए । तर एक जना बाहेक सबैको उद्धार गरियो ।

ती एक व्यक्ति अझै बेपत्ता रहेको बताइएको छ ।  श्रम दिवसको एक हप्ता लामो बिदाको अन्त्यतिर यो घटना भएको हो । राष्ट्रपति सी जिनपिङले बेपत्ता व्यक्तिको तत्कालै खोजी र उद्धार गर्न आदेश दिएका छन् । हालैका महिनाहरूमा देशका अन्य स्थानमा पनि यस्तै खालको घटनाहरू भएको भन्दै सीले सुरक्षा उपाय बलियो बनाउनुपर्नेमा जोड दिएको बताइएको छ ।

दुई महिना अघिमात्रै चीनको हुनान प्रान्तमा औद्योगिक जहाजसँग ठोक्किएर यात्रुवाहक डुङ्गा डुब्दा ११ जनाको मृत्यु भएको थियो ।