सभामुखको सचिवालयले भन्यो– प्रधानमन्त्रीले जवाफ दिने सूचना छैन

काठमाडौँ । अवरुद्ध संसद् खुलाउन प्रतिनिधिसभाका सभामुख देवराज घिमिरे र प्रमुख सचेतकहरूबिच छलफल भएको छ ।

विपक्षी दलले विद्युत् प्राधिकरणका कार्यकारी निर्देशक कुलमान घिसिङलाई हटाएकोबारे प्रधानमन्त्रीको जवाफ माग्दै बुधवारको संसद् बैठक अवरुद्ध पारेपछि सभामुखले प्रमुख सचेतकहरूसँग छलफल गरेका हुन् । संसद् भवन नयाँ बानेश्वरमा सभामुख र प्रमुख सचेतकहरूबिच छलफल भएको हो ।

यसैबिच सभामुखको सचिवालयले विपक्षीको माग अनुसार प्रधानमन्त्रीले जवाफ दिने सूचना नभएको जनाएको छ ।‘सभामुखले प्रमुख राजनीतिक दलका प्रमुख सचेतकहरूसँग छलफल गरिरहनुभएको छ । अहिलेसम्म प्रधानमन्त्रीले जवाफ दिने सूचना छैन’, सभामुख घिमिरेको सचिवालयले भनेको छ ।

सभामुख र प्रमुख सचेतकहरूबिचको छलफलका कारण ११ बजेका लागि निर्धारित प्रतिनिधिसभाको बैठक अझै सुरु हुन सकेको छैन ।