श्रीमतीको हत्या आरोपमा श्रीमान् पक्राउ

काठमाडौं। डडेल्धुरामा श्रीमतीको हत्या गरेको आरोपमा श्रीमान् पक्राउ परेका छन् । पक्राउ पर्नेमा अमरगढी नगरपालिका- ३ पथरोडाका ३२ वर्षीय डम्बरबहादुर थापा मगर छन् । २४ वर्षीया अस्मिता थापा मगरको हत्या गरेको अभियोगमा उनलाई सोमबार साँझ पक्राउ गरिएको प्रहरीले जनाएको छ ।

घरायसी विवादको क्रममा डम्बरबहादुरले आफ्नै घर आँगनमा एकनाले भरुवा बन्दुकबाट गोली प्रहार गर्दा अस्मिताको घटनास्थलमै मृत्यु भएको सूचना प्रहरीले प्राप्त गरेको थियो । जिल्ला प्रहरी कार्यालय डडेल्धुरा र प्रहरी चौकी बागबजारबाट खटिएको प्रहरीले उनलाई भरुवा बन्दुकसहित पक्राउ गरेको हो ।

थप अनुसन्धान भइरहेको प्रहरीले जनाएको छ।