संसदीय समितिमा रवि लामिछानेले सोधे– बाँसबारी जग्गा घोटालामा विनोद चौधरीको बयान लिइयो ?

काठमाडौं। राष्ट्रिय स्वतन्त्र पार्टी (रास्वपा) सभापति रवि लामिछानेले बाँसबारी छालाजुत्ता कारखानाको सरकारी जग्गा घोटाला प्रकरणमा नेपाली कांग्रेसका सांसद विनोद चौधरीसँग बयान लिइए/नलिइएकोबारे सरकारसँग प्रश्न गरेका छन् ।

सार्वजनिक जग्गा हिनामिनामा पक्राउ परेका  च्याम्पियन फूटवेयरका शेयर सदस्य अरुण चौधरीसरह शेयर रहेका विनोदसँग बयान किन नलिएको भनेर लामिछानेले प्रश्न गरेका हुन् ।गृहमन्त्री नारायणकाजी श्रेष्ठ र प्रहरी प्रमुख वसन्त कुँवर समेत उपस्थित प्रतिनिधि सभाको राज्य व्यवस्था समितिमा लामिछानेले चौधरीसँग बयान लिए/नलिएकोबारे प्रश्न गरे ।

‘अरुण चौधरीकैसरह शेयर भएका सत्तारुढ दलका सांसद विनोद चौधरीलाई अनुसन्धानको दायरामा राखेर बयान लिन सकिन्थ्यो होला, बयान लिइयो कि लिइएन ?’ रविले प्रश्न गरे । यसअघि प्रतिनिधि सभा बैठकमा नेमकिपा सांसद प्रेम सुवालले पनि बाँसबारी जग्गा घोटालामा कांग्रेस सांसद चौधरीको संलग्नता रहेको बताएका थिए ।

बैठकमा गृहमन्त्री श्रेष्ठले अनुसन्धानका लागि नियन्त्रणमा लिइएका व्यक्तिलाई दुई दिनभित्र छाड्नु भन्ने जिल्ला अदालत काठमाडौंको आदेश इतिहासमै नौलो भएको भन्दै असन्तुष्टि जनाए । 

प्रहरीले बाँसबारी जग्गा घोटालाको अनुसन्धान गरिरहेको समयमा कांग्रेस केन्द्रीय सदस्य समेत रहेका विनोद चौधरी भारतको राजधानी नयाँ दिल्ली पुगेका थिए । विनोद अरुणसरह शेयर होल्डर रहेको विवरण लोकान्तरले सार्वजनिक गरेको थियो ।