मोरङ्गको सुन्दरहरैचामा हात्ती मृत फेला

विराटनगर । मोरङ्गको सुन्दरहरैचामा हात्ती मृत अवस्थामा फेला परेको छ । सुन्दरहरैचा वडा नम्बर १० मुनाल मार्गमा बिहान जङ्गली हात्ती मृत अवस्थामा फेला परेको हो ।जिल्ला प्रहरी कार्यालय मोरङ्गका प्रहरी प्रवक्ता रञ्जन दाहालले हात्ती मृत फेला परेको बताए ।

उनले हात्ती के भएर मरेको भनेर स्पट नभएको बताए । स्थानीय महेश आचार्यले हात्तीको देब्रे कन्चटमा चोट लागेको देखिएको बताए । १० देखि १२ वर्षको हात्ती मृत फेला परेको हो ।

उनले मृत हात्तीको पुच्छर काटिएको र दाह्रा निकाल्न खोजिएको जस्तो देखिएको बताए । उनले बिहान २ बजेतिर गोली चलेको आवाज सुनेको बताएका छन् ।कोशी प्रदेश वन वातावरण तथा पर्यटन मन्त्रालयका सचिव विशाल घिमिरेले बिहान जङ्गली हात्ती मृत अवस्थामा फेला परेको बताए ।

उनका अनुसार घटना स्थलमा बनका कर्मचारीहरू पुगेका छन् । घटनाको विस्तृत विवरण आउन भने बाँकी रहेको घिमिरेले बताए । उनका अनुसार हात्तीको मृत्यु भएपछि पोष्टमार्टम गर्नु पर्ने व्यवस्था रहेको छ । पोस्टमार्टमका लागि कोशी टप्पु वन्यजन्तु आरक्षबाट विशेषज्ञ सहितको टोली बोलाउने तयारी भए पनि त्यहाँ तत्काल विशेषज्ञ नभएकाले चितवनसँग परामर्श भइरहेको छ । उनले चितवनबाट पोष्टमार्टमाका लागि टोली बोलाइने बताए ।