व्यापक जनपरिचालनसहित अभियान समापन गर्ने माओवादी केन्द्रको तयारी

काठमाडौँ । नेकपा माओवादी केन्द्रले व्यापक जनपरिचालनसहित अभियान समापन गर्ने तयारी गरेको छ । ‘जनतासँग माओवादी विशेष रुपान्तरण अभियान’ यही पुस १६ गते व्यापक जनपरिचालन सहित पालिकास्तरमा समापन तयरी भएको हो । 

माओवादी केन्द्रका अनुसार सबै पालिका, जिल्ला र प्रदेशहरुले अभियानको समग्र लिखित रिपोर्ट केन्द्रीय कार्यालयमा अनिवार्य रुपमा पठाउन पनि मातहतका कमिटीलाई निर्देशन दिइएको छ । 

माओवादीले गत भदौ १६ देखि ७ सय ५३ वटै स्थानीय तहमा वडा केन्द्रित माओवादी विशेष रूपान्तरण अभियान चलाएको थियो । सो अभियान सुरुमा तीन महिने भनिएपनि दसैँ तिहारलगायतका चाडपर्वका कारण प्रभावित भएको भन्दै पुस १६ गतेसम्म थप गरिएको हो । 

माओवादीको पदाधिकारी बैठकले  अभियान सकिएसँगै पुस अन्तिम साता स्थायी कमिटीको बैठक बोलाउने लगायतको निर्णय गरेको पार्टी केन्द्रीय कार्यालयले जनाएको छ ।