मुलुकको राष्ट्रिय स्वाधिनता सबै भन्दा अफ्ठ्यारो अवस्थामा पुगेको छः प्रचण्ड

काठमाडौं । नेपाली कम्युनिष्ट पार्टी (नेकपा) का संयोजक एवं पूर्वप्रधानमन्त्री पुष्पकमल दाहालले मुलुकको राष्ट्रिय स्वाधिनता सबै भन्दा अप्ठयारो अवस्थामा पुगेको बताउनुभएको छ । 

जेन–जी आन्दोलनपछि सबै परिघटनालाई पनि मुलुकको स्वाधिनता निकै अप्ठयारो अवस्थामा पुगेको देखिएको संयोजक दाहालको जिकिर थियो । आईतवार काठमाडौंमा आयोजित एक कार्यक्रममा बोल्दै उहाँले मुलुकलाई सो संकटबाट जोगाउनका लागि सबै देशभक्त कम्युनिष्टहरुबीच एकता आवश्यक रहेको बताउनु भयो । उहाँले सबै कम्युनिष्ट पार्टीहरु भित्र सिंगै कम्युनिष्ट आन्दोलनलाई एकतावद्ध गरेर अघि बढाउने आवाज उठेकाले नेतृत्वले त्यसलाई स्वीकार गरेर अघि बढ्नुपर्ने बेला आएको पनि बताउनु भयो । 

संयोजक दाहालले भन्नुभयो,‘अहिले हामी जे देखिरहेका छौ–सबभन्दा बढि त राष्ट्रिय स्वाधिनता सबै भन्दा अप्ठयारो ठाउँमा पुगेको देखिएको छ । कम्युनिष्ट आन्दोलनलाई संकटमा धकेल्ने निकै ठूलो कसरतहरु भई पनि राखेका छन् । तर तर मलाई के लाग्छ भने नेपालको इतिहासमा २००६ सालदेखि अहिलेसम्म कम्युनिष्टहरुको नेतृत्वमा वर्ग संघर्षहरु भए, जन संघर्षहरु भए, जनआन्दोनलहरु भए त्यसका जगमा नेपाली जनता कम्युनिष्ट आन्दोलनप्रति साँच्नै गहिरो गरी विश्वस्त नै छन् । हामी नेतृत्वकर्तांहरुले जनताको त्यो भावनालाई जनताको एकताको त्यो चाहनालाई सम्मान गरेर आफ्ना कतिपय कुराहरु थाति राखेर राष्ट्र र जनताको हितमा केन्द्रित भएर जाने हो भने अहिलेको परिस्थिति त यो नकारात्मक नै हो । भदौ २३, २४ पछि नेपालमा जे जे परिघटना देखापरेका छन् । यो सबै नकारात्मक परिघटना भित्र एउटा सकारात्मक आधार छिपेको म देख्छु । त्यो भनेको अव सबै भित्र एकताको माग हुन थालेको छ । कम्युनिष्ट र देशभक्त शक्तिहरु मिल्नु प¥यो भन्ने आवाज देशभरबाट उठेका छन् ।’

त्यस अवसरमा संयोजक दाहालले नेतृत्वको कम्युनिष्ट आन्दोलनलाई एकतावद्ध बनाउनका लागि अभिभावकीय भूमिका निर्वाह गरिदिन नेकपा (मसाल)का महामन्त्री मोहनविक्रम सिंहलाई आग्रह पनि गर्नुभयो