विशेष अदालतको फैसलाविरुद्ध सर्वोच्चमा पुनरावेदन मुद्दा दर्ता

काठमाडौं। भ्रष्टाचार मुद्दामा विशेष अदालत काठमाडौंको फैसलाविरुद्ध सर्वाेच्चमा पुनरावेदन मुद्दा दर्ता भएको छ ।अख्तियार दुरुपयोग अनुसन्धान आयोगले विशेषको फैसला चित्त नबुझी बिहीवार सर्वाेच्चमा पुनरावेदन मुद्दा दायर गरेको हो ।

आयोगका प्रवक्ता नरहरि घिमिरेका अनुसार आयोगले मालपोत कार्यालय सिमराका प्रमुख (नायब सुब्बा) मदनप्रसाद गुप्ता, लेखापाल युगलकिशोर ठाकुर र नायब सुब्बा शत्रुधन राउतविरुद्ध ४ करोड ५८ लाख ७१ हजार २० रुपैयाँ भ्रष्टाचार गरेको आरोपमा मुद्दा दायर गरेको थियो ।

तर विशेषले उक्त मुद्दामा दाबी नपुग्ने भन्दै उनीहरूलाई सफाइ दिएको थियो ।विशेषको सो फैसला चित्त नबुझी बिहीवार सर्वाेच्च अदालतमा पुनरावेदन मुद्दा दायर गरिएको आयोगले जनाएको छ ।

मालपोतका प्रमुख गुप्ता, लेखापाल ठाकुर र नायब सुब्बा राउतले आर्थिक वर्ष २०७५/०७६ को फागुनमा संकलित रकम कार्यालयको खातामा दाखिला नगरी हिनामिना गरेको आयोगको दाबी छ ।