गणतन्त्रवादी दलहरू त्रसित मानसिकतामा पुगे, अब गणतन्त्र जोगिँदैन : राप्रपा

काठमाडौँ । राष्ट्रिय प्रजातन्त्र पार्टीले आजको सर्वदलीय बैठकलाई गणतन्त्रवादी दलहरूको पराजित मानसिकताको उपजको संज्ञा दिएको छ ।

संसद्का दुई बलिया राजनीतिक दलहरुलाई बाहिर राखेर प्रधानमन्त्री पुष्पकमल दाहाल ‘प्रचण्ड’ले आज ‘सर्वदलीय’बैठकमा छलफल गरेका थिए । गणतन्त्र मान्ने र शान्ति प्रक्रियामा सहभागी दलका शीर्ष नेता बैठकमा सहभागी थिए ।

बैठकमा निम्तो नपाएपछि पार्टीका प्रवक्ता मोहन श्रेष्ठले जनतालाई डेलिभरी दिन नसकेको गणतन्त्रको आयु लामो नरहेको बताए ।

उनले भने, ‘गणतन्त्र यो देशका लागि सुहाउँदो व्यवस्था होइन भन्ने जनताले बुझिसकेका छन् । अब दलहरू बैठक बस्दैमा गणतन्त्र जोगिँदैन । यो उनीहरूको पराजित मानसिकता मात्रै हो ।’

६२÷६३ सालपछि माओवादीको हिंसात्मक आन्दोलनको जगमा अनायास आएको गणतन्त्रले देशको सार्वभौमिकता र एकता नै खण्डित बनाएको तथा जनतालाई डेलिभरी पनि दिन नसकेको श्रेष्ठको बुझाइ छ ।

उनी थप्छन्, ‘गणतन्त्रप्रति जनताको मोह भङ्ग भइसकेको छ । अब उनीहरूले अवस्था परिवर्तन मात्र होइन कि व्यवस्था परिवर्तन नै चाहेका छन् । यो जनभावनाको नेतृत्व राप्रपाले गर्नेछ ।’

गणतन्त्रविरोधि माहोल बढ्दै जाँदा गणतन्त्रवादी राजनीतिक दलहरू आत्तिनु स्वभाविक रहेको श्रेष्ठको प्रतिक्रिया छ ।

पार्टी अध्यक्ष राजेन्द्र लिङदेन विदेशबाट फर्किएपछि आन्दोलनको विषयमा ठोस निर्णय लिने उनले बताए । जनताको साथ लिएर चार वर्षभित्रै गणतन्त्र उल्ट्याएर राजतन्त्र ल्याउने उनले दाबी गरेका छन् ।