गाउँघरका महिलाहरूको जीवनस्तर उकास्न सामाजिक अभियान चलाउन आवश्यक छ : राष्ट्रपति पौडेल

काठमाडौं। राष्ट्रपति रामचन्द्र पौडेलसमक्ष राष्ट्रिय महिला आयोगले शुक्रवार आफ्नो १६ औं वार्षिक प्रतिवेदन पेस गरेको छ ।प्रतिवेदन ग्रहण गर्दै राष्ट्रपति पौडेलले महिलाको हकहित, लैंगिक समानता, महिला सशक्तीकरणसँग सम्बन्धित विषयमा आयोगको जिम्मेवारी र दायित्व गहन रहेको बताएका थिए । 

उनले धेरै प्रयासका बाबजुद केही क्षेत्रमा महिलाको उपस्थिति आशालाग्दो देखिए पनि जनसंख्याको आधा हिस्सा ओगटेको वर्गको निर्णायक तहमा प्रतिनिधित्व अझै सन्तोषजनक नभएको बताएका थिए ।

“जनजीवनका अन्य महत्वपूर्ण क्षेत्रमा महिलाको उपस्थिति र योगदानलाई अझ प्रभावकारी माध्यमबाट सुनिश्चित गर्नुपर्ने देखिएको छ, आगामी दिनमा त्यसमा महिला आयोगले अझ सशक्त र प्रभावकारी रुपमा कार्यसम्पादन गर्नेछ भन्ने मैले विश्वास लिएको छु”, उनले भने ।

आयोगले आफ्नो संवैधानिक र कानूनी दायित्व पूरा गर्दै गरेका काम र क्रियाकलापहरू समेटेर तयार पारेको प्रतिवेदनले उठान गरेका विषयहरूलाई सरकारले सम्बोधन गर्ने राष्ट्रपति पौडेलको विश्वास थियो ।

गाउँघरमा पछाडि परेका महिलाहरूको जीवनस्तर उकास्न सामाजिक अभियान चलाउन आवश्यक रहेको उनले बताए ।सो अवसरमा आयोगकी अध्यक्ष कमला पराजुलीले आयोगले गरेका काम कारवाहीको बारेमा संक्षिप्त जानकारी गराएकी थिइन् । उनले महिला हक अधिकारको संरक्षण तथा हिंसा पीडित महिलालाई प्राथमिकता दिएर आयोगले काम गरिरहेको बताएकी थिइन् ।