कोशी एमालेका १५ चुनौती : जनमत रास्वपातिर मोडिने भयदेखि पार्टीमा चौतर्फी घेराबन्दीसम्म

विराटनगर। नेकपा (एमाले) कोशी प्रदेशले जनतामा व्यापक निराशा र असन्तुष्टि उत्पन्न भएको स्वीकार गरेको छ ।एमालेको जारी प्रदेश अधिवेशनमा प्रस्तुत राजनीतिक तथा साङ्गठनिक प्रतिवेदनमा जनतामा व्यापक निराशा र असन्तुष्टिको अवस्था आएको उल्लेख छ।

निराश र असन्तुष्टहरू राष्ट्रिय स्वतन्त्र पार्टीप्रति आकर्षित भएको प्रतिवेदनमा उल्लेख छ । युवा पङ्क्तिलाई समेत रास्वपाले आकर्षित गरिरहेको प्रतिवेदनमा लेखिएको छ।कोशी प्रदेशको आर्थिक र सामाजिक निम्ति १५ वटा चुनौती रहेको प्रतिवेदनमा उल्लेख छ ।

पार्टीका नेता शेरधन राई संयोजक, हिक्मत कार्की र सुवोधराज प्याकुरेल सदस्य रहेको आर्थिक सामाजिक रुपान्तरण र प्रस्ताव मस्यौदा कार्यदलले १५ वटा चुनौती औंल्याएको हो । राजनीतिक अस्थिरताका कारण जनतामा निराशा उत्पन्न भएकाले  जनमत 'स्विङ' हुने अवस्था रहेको प्रतिवेदनमा उल्लेख छ ।

प्रदेशलाई हस्तान्तरण गर्नुपर्ने अधिकारहरू अहिलेसम्म संघीय सरकारले हस्तान्तरण नगरेका कारण चुनौती रहेको मस्यौदामा उल्लेख छ । यस्तै निजामती सेवा ऐन नबन्दा प्रदेशको हातमा कर्मचारी संरचना नभएको एमालेको ठहर छ । प्रदेश संरचनाकै औचित्यमाथि प्रश्न उठ्न थालेको अवस्था आएको प्रतिवेदनमा उल्लेख गरिएको छ।प्रतिवेदनमा एमालेलाई चौतर्फी घेराबन्दी गरिएको पनि उल्लेख छ ।

४८ पृष्ठ लामो राजनीतिक तथा साङ्गठनिक प्रतिवेदनमा  राजनीतिक रूपमा क्रियाशील कुनै दलसँगको अन्तर्विरोध प्रधान नरहेको उल्लेख छ । नेकपा एकीकृत समाजवादीबारे भने प्रतिवेदनमा केही पनि उल्लेख छैन । ​'राजनीतिक परिवर्तनमा कुनै न कुनै रूपमा भूमिका खेलेका साथै विभिन्न मुद्दामा सहकार्य र प्रतिस्पर्धाको अवस्था विद्यमान रहेको हुनाले कुनै पनि दल विशेषलाई प्रधानशत्रु घोषणा गर्नु कम्युनिस्ट आन्दोलनमा अतिवादी गल्ती हुन जान्छ,’ अध्यक्ष तुलसीप्रसाद न्यौपानेको राजनीतिक तथा साङ्गठनिक प्रतिवेदनमा भनिएको छ ।

यद्यपि पहिचानको नामको विषयलाई लिएर एमालेविरुद्ध अनेकौं भ्रामक प्रचार भएको प्रतिवेदनमा उल्लेख छ । एमालेलाई पहिचान विरोधी बिल्ला भिराउने प्रयास भइरहेकोसमेत प्रतिवेदनमा उल्लेख छ । 

यस्तै एमालेले मोरङ क्षेत्र नम्बर ५ बाट स्वतन्त्र रूपमा निर्वाचित सांसद योगेन्द्र मण्डल आफ्ना कार्यकर्ता रहेको जनाइएको छ । जसपा र एमालेबीच चुनावी तालमेल हुँदा एमालेका योगेन्द्र मण्डलले बागी उम्मेदवारी दिएर चुनाव जितेका थिए । उनी चुनाव जितेपछि एमालेमा गएका छैनन् । यसअघि मोरङको जिल्ला कमिटीको बैठकले मण्डललाई कारबाही गर्न प्रदेश कमिटीलाई सिफारिस गरेको थियो । 

एमालेले इलामको निर्वाचन क्षेत्र २ मा हुने उपनिर्वाचनको तयारी शुरू गर्ने पनि प्रतिवेदनमा उल्लेख गरेको छ ।इलाम निर्वाचन क्षेत्र नं. २ बाट निर्वाचित प्रतिनिधिसभा सदस्य सुवास नेम्वाङको निधन भएपछि उक्त क्षेत्र खाली छ । अधिवेशनमा तीन वटै प्रतिवेदन छलफल भइरहेका छन् ।