९ दिनसम्म उभिएर धर्ना दिँदा ईः को स्वास्थ्य नाजुक, उभिनसमेत दुइवटा लौरोको सहायता

काठमाडौं। काठमाडौँ महानगरपालिकाले फुटपाथ व्यवसायीलाई धरपकड गरेको विरोधमा निरन्तर उभिएर आन्दोलनरत अभियन्ता ईः को स्वास्थ्य अवस्था बिग्रिँदै गएको छ। ९ दिनदेखि उभिइरहेका उनको खुट्टा सुन्निएको छ भने शरीरमा पनि खटिराहरू देखिएका छन् ।

उनलाई उभिन पनि दुइटा लौरोको सहायता चाहिने अवस्था आएको छ । यसअघि एउटा लौरो टेकेर उभिँदै आएका थिए ।मंगलबार महानगर र ई: बीचको वार्ता निष्कर्षविहीन बनेको थियो ।

वार्तामा चार बुँदे समझदारी पत्रको ड्राफ्ट गरिए पनि महानगर प्रमुख बालेन शाहले ड्राफ्टमा उल्लेखित केही विषयमा असहमति जनाएपछि वार्ता निष्कर्षविहीन बनेको थियो । ई र उनका सहकर्मीहरूले फुटपाथ र सार्वजनिक स्थलमा व्यापार गर्ने विषयलाई सम्बोधन गर्न ८ दिनदेखि राष्ट्रिय सभागृहको मूल गेटमा उभिएर प्रदर्शन गर्दै आएका छन् ।