सामूहिक राजीनामा दिने हेटौंडाका चिकित्सकको चेतावनी

हेटौंडा । सहकर्मी कुटिएपछि हेटौंडाका सरकारी तथा निजी अस्पतालका चिकित्सकले सामूहिक राजीनामा दिने चेतावनी दिएका छन् । प्रहरी, प्रशासनलगायत सरोकारवालासँगको छलफलमा सुरक्षा माग गर्दै उनीहरूले आन्दोलन गर्ने बताएका छन् ।

गत श्रावण २५ गते हेटौंडा उपमहानगरपालिका- १२ निवासी ४१ वर्षका राजेश प्रधानको डेंगुको कारण चितवनको नयाँ मेडिकल कलेजमा मृत्युको घटनालाई लिएर उनका आफन्तसहित केही युवाले सञ्चो अस्पतालको लापरबाही भन्दै बुधबार डा. प्रशान्त विडारी र विकास थापामाथि ड्युटी गरिरहेको समयमा आक्रमण गरेका थिए । उनीहरूको आँखा र अनुहारमा चोट लागेको छ ।

सीसीटीभी फुटेजको आधारमा प्रहरीले ४ जनालाई पक्राउ गरेको छ । जसमा मृतककी श्रीमती रमा, छोरी रमिता, छोरा रोहित र भतिज अनुप प्रधानलाई पक्राउ गरेको मकवानपुरका प्रहरी प्रवक्ता एवं डीएसपी लक्ष्मी भण्डारीले बताए ।