खराब नेता र नेतृत्वको पछि लागेर देश परिवर्तन हुदैन : रवि लामिछाने

नवलपरासी । राष्ट्रिय स्वतन्त्र पार्टीका सभापति रवि लामिछानेले भष्टाचारीलाई कारवाही हुने हो भने पुराना पार्टीका औंलामा गन्न सकिने मात्र नेता बच्ने बताएका छन । देश भष्ट्राचारको दलदलमा रहेको बताउँदै लामिछानेले सुनकाण्ड, भुटानी शरणार्थी काण्ड र ललिता निवास काण्डको निस्पक्ष छानबिन हुँदा पुराना पार्टीका धेरै नेताहरु कारवाहीमा पर्ने बताए ।

शनिबार पश्चिम नवलपरासीको बर्दघाटमा क्षेत्रीय भेलालाई सम्बोधन गर्दै लामिछानेले खराब र घुसिया नेता जो कोही भए पनि कारवाही हुनै पर्ने बताए । उनले भने, 'खराब नेता र नेतृत्वको पछि लागेर देश परिवर्तन हुदैन । देशले परिवर्तन खोजेको छ परिवर्तनका लागी सहि नेता र नेतृत्वको छनोट गर्नु पर्छ ।'

राष्ट्रिय स्वतन्त्र पार्टीले खराव र घुसिया नेता नराख्ने बताउँदै लामिछानेले रास्वापा भष्टाचारीहरुलाई पाल्ने नभई फाल्ने पार्टी भएको जिकिर गरे । पुरानो पार्टी तर्फ इंगित गर्दै लामिछानेले भने , 'भष्टाचारमा मुसिएकालाई पाल्न सक्दैन, रास्वपाले भष्टाचारीहरुलाई छानिछानी फाल्ने हो ।'