रामनगरमा ४ महिना श्रमदान गरेपछि खानेपानी

चितवन । चितवनको रामनगरमा झण्डै ४ महिना श्रमदान गरेर खानेपानी ल्याइएको छ ।

भरतपुर महानगरपालिका– २९ स्थित खहरेखोलाको पानी ल्याउन भरतपुर महानगरपालिका–१ का स्थानीयले श्रमदान गरेका हुन् । उनीहरूलाई चितवनका विभिन्न क्षेत्रका नागरिकले पनि श्रमदानमा साथ दिएका थिए । 

भरतपुरको रामनगर, ठिमुरा र देवघाट क्षेत्रका वासिन्दालाई पानी खुवाउन राष्ट्रिय स्वतन्त्र पार्टीका सभापति रवि लामिछानेले श्रमदानको शुरूआत गरेका थिए । उनले स्थानीयलाई गरेको वाचाअनुसार नै निर्धारित समयमा खानेपानी ल्याइएको छ ।

८ किलोमिटर लामो दूरीमा नयाँ पाइप बिछ्याएर रामनगरस्थित ट्यांकीमा पानी झारिएका थिए । स्थानीय सीता भट्ट रामनगरवासीको मुख्य समस्या पानी रहेको भन्दै खहरेखोलाको पानी आएपछि निकै खुशी भएको बताए । उनले नियमितरूपमा श्रमदानमा खटिएको समेत बताए । स्थानीय राधा कुँवर घरको काम छाडेर जनश्रममा जुटेको भन्दै पानी आएपछि उत्साहित भएको बताए । उनले अब पानीको लागि झेल्दै आएको समस्या समाधान भएको बताए ।

विक्रम संवत् २०४९ चैतमा नेपाल र जापान सरकारको सहकार्यमा भरतपुर खानेपानी विस्तार आयोजनाको शुरूआत भएको थियो । त्यसबेला रामनगरमा ४ वटा पानी ट्यांकी निर्माण गरिएका थिए । जुगेडीबाट पानी उक्त क्षेत्रमा ल्याएर भरतपुरका विभिन्न स्थानसम्म वितरण हुने गर्दथ्यो । द्वन्द्वकालपछि धेरै संरचना नष्ट भएपछि खानेपानी ट्यांकी क्षेत्र झाडीमा परिणत भएको थियो । अहिले सोही ठाउँमा सरसफाइ गर्दै खानेपानीका ल्याइएको हो ।

रामनगर क्षेत्रमा हरेकको घरमा इनार भए पनि जनघनत्व बढ्दै जाँदा खानेपानीको अभाव पनि बढ्दै गएकाले खहरेखोलाको पानी ल्याउनुपरेको स्थानीय तुलसीराम श्रेष्ठले बताए । खहरेखोलाबाट खानेपानी आएपछि दीर्घकालीन समस्या समाधान भएको उनको भनाइ छ । त्यतिखेर जाइकाले निर्माण गरेकै ट्यांकीलाई प्रयोग गरेर खानेपानी विस्तार गरिएको सभापति लामिछानेका स्वकीय सचिव प्रकाश सिग्देलले जानकारी दिए ।

‘भूइँमा बिछ्याएको पाइप सबै चोरिएको थियो । त्यसैले मुहानबाट रामनगरसम्म पूरै पाइप बिछ्याइएको हो,’ उनले भने, ‘मुहान र बीचको ट्यांकी प्राविधिकहरूको सल्लाहअनुसार प्रयोग गरिएको छ  ।’

रामनगर, ठिमुरा र देवघाट क्षेत्रमा करीब ४ हजार घरधुरी रहेकामा तत्कालका लागि रामनगर र ठिमुरा क्षेत्रका करीब २ हजार ५०० घरधुरीलाई खानेपानीको व्यवस्थापन गर्ने तयारी भइरहेको उनले बताए । ‘त्यसपछि पानीको स्रोतले पुगेसम्म वितरण गर्ने योजना छ,’ उनले भने, ‘वडा नम्बर १ को माथिल्लो क्षेत्रमा पुगेर बढी भएमा आँपटारीभन्दा तलसम्म पनि पुर्‍याउन सकिन्छ ।’ यसले भरतपुर महानगरपालिका भित्रको खानेपानी व्यवस्थापनलाई ठूलो मद्दत पुग्ने उनले बताए ।

श्रमदानबाट खानेपानी ल्याउन करीब १ करोड खर्च भएको जनाइएको छ । ८ किलोमिटरको दूरीमा नयाँ पाइप खरिद र बिछ्याउने तथा ट्यांकी मर्मत र सरसफाइ तथा प्राविधिक खर्च गरी करीब १ करोड रुपैयाँ खर्च भएको उनले बताए । ‘यी सबै खर्च जनस्तरबाटै संकलन गर्ने र सरकारी बजेट कहीँबाट पनि नलिइकनै काम गरेका छौं,’ उनले भने, ‘यहाँका जनताले आफैं खुशी भएर सहयोग गरेका छन् ।’