अध्यादेशमार्फत् कोशी प्रदेशले ल्यायो ३६ अर्ब २४ करोड ३५ लाखको बजेट

विराटनगर । कोशी प्रदेश सरकारले अध्यादेशमार्फत् आर्थिक वर्ष २०८०/८१ का लागि ३६ अर्ब २४ करोड ३५ लाख १० हजार रुपैंयाँको बजेट सार्वजनिक गरेको छ ।

मुख्यमन्त्री हिक्मतकुमार कार्कीले बिहीबार अध्यादेशमार्फत आर्थिक मामिला मन्त्रालयको सभाहलमा आर्थिक वर्ष २०८०/८१ को बजेट सार्वजनिक गरेका हुन्

उनले वाचन गरेर सार्वजनिक गरेको बजेटमा पुँजीगततर्फ १८ अर्ब २३ करोड ४२ लाख ५२ हजार र चालूतर्फ १४ अर्ब ३९ करोड ६३ लाख ६६ हजार रुपैयाँ छुट्याइएको छ ।

बजेटमा केन्द्रका सांसदलाई विकास निर्माणमा छुट्याए जसरी कोशी प्रदेशसभा सदस्य पूर्वाधार विकास कार्यक्रम पनि समावेश गरिएको छ । उक्त विकास कार्यक्रमका लागि १ अर्ब ५० करोड रुपैयाँ छुट्याइएको छ ।

विनियोजित बजेटमध्ये प्रत्यक्ष निर्वाचन जितेका प्रदेशसभा सदस्यले २ करोड रुपैयाँ र समानुपातिक प्रदेशसभा सदस्य बनेकालाई १ करोड रुपैयाँ छुट्याइएको छ ।