सशस्त्र प्रहरीद्वारा पाँच ठाउँमा विपद् व्यवस्थापन वेश स्थापना

काठमाडौँ । सशस्त्र प्रहरी बल (एपीएफ) नेपालले देशका विभिन्न ५ ठाउँमा विपद् व्यवस्थापन वेश स्थापना गरेको छ । साथै अन्य २ ठाउँमा १/२ दिनभित्रै स्थापना गरिने एपीएफले जनाएको छ ।यस अघि धादिङको आदमघाट, बाराको निजगढ र धनकुटाको मुलघाटमा रहेको सुरक्षा वेशलाई विपद् व्यवस्थापन वेशको रुपमा स्तरोन्नति गरिएको छ । यस्तै म्याग्दीस्थित वेनीमा रहेको आश्रित गुल्म तथा डडेलधुराको अमरगढीस्थित नम्बर ५२ गुल्ममा अट्याच रहने गरी विपद् व्यवस्थापन वेश स्थापनमा गरिएको हो ।

आदमघाट र निजगढमा सशस्त्र प्रहरी नायव उपरीक्षक र वेनी, मुलघाट तथा अमरगढीमा सशस्त्र प्रहरी निरीक्षकको कमाण्डमा आवश्यक सामग्रीसहित विपद् व्यवस्थापन तालिम प्राप्त जनशक्ति तैनाथ गरिएको छ ।

यसका साथै दाङको भालुवाङ र सुर्खेतको चिप्लेमा १/२ दिन भित्रै वेश स्थापनाको तयारी रहेको एपीएफले जनाएको छ । भालुवाङमा रहेको सशस्त्र प्रहरी बल नेपाल नम्बर २९ ज्वालामाई गणमा अट्याच रहने र सुर्खेतको चिप्लेमा यस अघि नै रहेको सुरक्षा वेशलाई स्तरोन्नति गरी विपद् व्यवस्थापन वेश स्थापना गर्ने तयारी गरिएको हो ।

स्थापना भइसकेका विपद् व्यवस्थापन वेशमा आवश्यक सामान र जनशक्ति तैनाथ गरिसकेको छ भने अन्य तीन ठाउँमा पठाउने प्रक्रियामा रहेको छ । एपीएफ नेपाल विपद् व्यवस्थापन तालिम शिक्षालय कुरिनटारबाट उत्पादित जनशक्तिलाई ति ठाउँमा परिचालन गरिएको हो ।

यसबाट तत्काल मनसुन जन्य प्रकोप तथा अन्य अवस्थामा हुने विपद्लाई समेत न्यूनीकरण गर्न र उद्धार कार्यलाई थप प्रभावकारी बनाउन सहज हुने सशस्त्र प्रहरी नायब उपरीक्षक एवं सह–प्रवक्ता शैलेन्द्र थापाले जानकारी दिए ।