कर्णालीका मुख्यमन्त्री शर्माले पाए विश्वासको मत, पक्षमा खस्यो ३८ सांसदको मत

सुर्खेत । कर्णाली प्रदेशका मुख्यमन्त्री राजकुमार शर्माले विश्वासको मत प्राप्त गरेका छन् । शुक्रबार बसेको प्रदेशसभाको बैठकमा मुख्यमन्त्री शर्माले विश्वासको मत माग्दा पक्षमा चार दलका ३८ सांसदको मत प्राप्त गरेका हुन् ।

मतदानमा उपस्थित ३९ जना सांसदमध्ये मुख्यमन्त्री शर्माको पक्षमा ३८ मत पर्दा विपक्षमा १ मत खस्यो । मुख्यमन्त्री शर्माले राप्रपाबाहेक सबै दल र स्वतन्त्र सांसदको पनि मत पाए ।

मुख्यमन्त्री शर्मालाई नेपाली कांग्रेसका १४, नेकपा माओवादी केन्द्रका १३, नेकपा एमालेका ९, नेकपा एकीकृत समाजवादी र स्वतन्त्र (देवराज शाही) गरि १÷१ सांसदले पक्षमा मत हाले ।

मुख्यमन्त्री शर्माले ६ माघमा एमाले, राप्रपाको समर्थनमा विश्वासको मत पाएका थिए । संघबाट एमाले, राप्रपाले समर्थन फिर्ता लिए पनि कर्णालीमा एमालेले सरकारलाई दिएको समर्थन फिर्ता लिएन । शर्मा गत पुस २७ गते कर्णालीको मुख्यमन्त्रीमा नियुक्त भएका थिए ।