कर्णालीका मुख्यमन्त्रीले आज विश्वासको मत लिँदै

सुर्खेत । कर्णाली प्रदेशका मुख्यमन्त्री राजकुमार शर्माले आज विश्वासको मत लिँदैछन् । यसअघि प्रदेश सरकारमा सामेल राप्रपाले मुख्यमन्त्रीलाई दिएको समर्थन फिर्ता लिएपछि उनले पुनः विश्वासको मत लिनुपरेको हो ।

आज दिउँसो ३ बजे बस्ने प्रदेशसभा बैठकमा मुख्यमन्त्री शर्माले विश्वासको मत लिने तय भएको हो । तर उनले कुन कुन दलको विश्वास आर्जन गर्छन्, यसबारे अहिले नै टुंगो लागेको छैन ।

मुख्यमन्त्रीलाई सुरुमा नेकपा एमाले, राप्रपा लगायत दलहरुले विश्वासको मत दिएका थिए । राप्रपाले समर्थन फिर्ता लिए पनि एमालेले भने कायमै राखेको थियो । आज पुनः एमालेले विश्वासको मत दिने या नदिने भन्नेबारे केही निर्णय सार्वजनिक गरेको छैन । नेपाली कांग्रेस यसअघिदेखि सत्तामा छैन । प्रदेशको ठूलो दल कांग्रेसले पनि विश्वासको मत दिने नदिने बारे यकी गरिसकेको छैन ।

विश्वासको मत दिने नदिनेबारे मुख्य पार्टीका प्रदेश संसदीय दलका नेताहरु बिहानैदेखि छलफलमा रहेको बताइएको छ । कुल ४० सदस्य रहेको कर्णाली प्रदेशसभामा मुख्यमन्त्रीले विश्वासको मत पाउन २१ प्रदेश सांसदको समर्थन जुटाउनुपर्नेछ । प्रदेश सभामा ठूलो दल कांग्रेसका १४ जना, माओवादी केन्द्रका १३ जना, एमालेका १० तथा राप्रपा, एकीकृत समाजवादी र स्वतन्त्र सांसद गरी १–१ जना रहेका छन् । एमालेको सभामुख रहेका छन् ।