लागूऔषधसहित चारजना पक्राउ

काठमाडौं । काठमाडौंको चन्द्रागिरि नगरपालिका –२ नागढुङ्गाबाट नियन्त्रित लागूऔषध नाइट्राभेट १ हजार ५ सय ट्याब्लेट र नगद २५ हजार ५ सय रुपैयाँसहित तीन जना पक्राउ परेका छन् । झापा अर्जुनधारा नगरपालिका –२ बस्ने २८ वर्षीय अभिषेक शिवाकोटीलगायत ३ जनालाई सोमबार  प्रहरीले पक्राउ गरेको हो । 

प्रहरी प्रभाग नागढुङ्गा र लागूऔषध नियन्त्रण व्यूरोबाट खटिएको प्रहरीले सप्तरी राजबिराजबाट काठमाडौंतर्फ आउँदैगरेको ना. ८ ख ६४९६ नम्बरको बसलाई जाँच गर्नेक्रममा सो लागूऔषधसहित फेला पारी पक्राउ परेको प्रहरीले जनाएको छ ।  

त्यस्तै, मोरङको विराटनगर महानगरपालिका –१५ एक नम्बर ढाटबाट अवैध लागूऔषध ब्राउनसुगरजस्तो देखिने पदार्थ १ ग्राम ७२ मिलिग्रामसहित सुनसरी धरान उपमहानगरपालिका–५ बस्ने २९ वर्षीय उज्ज्वल हल्वाईलाई सोमबार प्रहरीले पक्राउ गरेको छ । 

लागूऔषध नियन्त्रण व्यूरो विराटनगरबाट खटिएको प्रहरीले भारतबाट नेपालतर्फ आउँदैगरेको प्रदेश १–०४–००१ प ८६५१ नम्बरको मोटरसाइकललाई जाँच गर्नेक्रममा सो पदार्थसहित फेला पारी उनलाई पक्राउ गरेको प्रहरीले जनाएको छ ।