सुदूरपश्चिमको सभामुखका लागि आज दोस्रोपटक मतदान हुँदै

धनगढी । सुदूरपश्चिम प्रदेशको सभामुख पदका लागि आज दोस्रोपटक मतदान हुँदै छ । यसअघि बिहीबार सभामुख पदका लागि मतदान भएको थियो । तर कुनै उम्मेदवारको पनि बहुमत नआएपछि आज पुनः मतदान हुन लागेको हो ।

सभामुख चयनका लागि प्रदेश संसदमा प्रतिनिधित्व गर्ने सबै दलबीच आज बिहान सर्वदलीय छलफल भएको थियो । सहमतिबाट समामुख चयन हुने सम्भावना नरहेपछि पुनः मतदानबाट चयन गर्ने र आजै साँझ ६ बजे मतदान गराउनेबारे सबै दल सहमत भएको बताइएको छ ।

प्रदेश सभा हाँक्नका लागि हालको एमाले-माओवादी सत्ता गठबन्धनबाट माओवादी केन्द्रका भीम भण्डारी र नेपाली कांग्रेसका तर्फबाट मानबहादुर रावल सभामुखका उम्मेदवार उठेका छन् । बिहीबार भएको मतदानमा कुनै उम्मेदवारको पनि बहुमत पुगेको थिएन । भण्डारीको पक्षमा २६ मत र रावलको पक्षमा २३ मत खसेको थियो । तर सभामुख बन्नका लागि बहुमत पुग्न २७ मत चाहिन्छ ।

कुल ५३ सदस्य रहेको प्रदेश सभामा माओवादी केन्द्रका ११, एमालेका १०, नागरिक उन्मुक्ति पार्टीका ७ र राप्रपाका एक सांसद रहेका छन् । विपक्षमा रहेको कांग्रेस प्रदेशसभाको सबभन्दा ठूलो दल भए पनि गठबन्धन भत्कँदा उसको पनि बहुमत नपुग्ने देखिन्छ । कांग्रेसका १९ जना र एकीकृत समाजवादीका ४ सांसद छन् भने १ जना स्वतन्त्र सांसाद छन् ।