अस्पतालमा काम गर्दैन मोबाइलको नेटवर्क

कैलाली । सुन्दा अचम्म लाग्छ । शहरमा पनि मोबाइल फोनको नेटवर्कले काम गर्दैन भनेर ।

सुदूरपश्चिम प्रदेशको गोदावरीमा मालाखेती अस्पताल छ । प्रदेशको स्थायी राजधानी गोदावरीमै रहेको अस्पतालको क्षेत्रभित्र मोबाइल फोनको नेटवर्कले काम नै गर्दैन । 

अस्पताल परिसरभित्र नेपाल टेलिकमको नेटवर्कले काम नगर्दा त्यहाँका कर्मचारी समस्यामा परेको गुनासो गर्छन् । अस्पतालभित्र मोबाइलमा नेटवर्क नआउँदा कर्मचारीको फोन नलाग्ने भएकाले फोन गर्नुपरेमा बाहिर जानुपर्ने बाध्यता छ । 

अस्पतालका कार्यालय प्रमुख डा। अम्रेश कोइरालाले अस्पतालको भवनभित्र छिर्ने बित्तिकै मोबाइल फोनमा टावर जाने गरेको बताए । अन्य कर्मचारीको गुनासो छ, ‘जरुरी कामले कसैले फोन गर्दा पनि सम्पर्क हुन सकेन भन्छ, फोन गर्न पनि अस्पताल भवन बाहिर जानुपर्ने बाध्यता छ ।’

अस्पतालमा मोबाइल फोनको नेटवर्क नआउँदा आफन्तलाई र घरपरिवारलाई बिरामीको अवस्थाबारे जानकारी दिन पनि समस्या रहेको स्थानीय नरेश महरा बताउँछन् ।

नेपाल टेलिकम अत्तरिया शाखाका वरिष्ठ प्राविधिक अधिकृत सुरत मल्ल भन्छन्, ‘अस्पतालबाट ५०० मिटर टाढा नेटवर्क टावर भएकाले समस्या भएको हुनसक्छ । कार्यालयभित्र केको समस्या हो पत्ता लगाई छिट्टै समस्या समाधान गरिने भएको छ ।’