सिट बाँडफाँटको काम १० प्रतिशत मात्र बाँकी : झलनाथ खनाल

काठमाडौं । नेकपा (एकीकृत समाजवादी) का सम्मानित नेता झलनाथ खनालले चुनावका लागि सत्ता गठबन्धनबीच सिट बाँडफाँटको विषय अन्तिम चरणमा पुगेको बताएका छन ।

समाजवादी प्रेस सङ्गठन नेपाल कास्कीले पोखरामा शनिबार गरेको पत्रकार भेटघाट कार्यक्रममा बोल्दै उनले सहमतिका लागि १० प्रतिशत काम मात्र बाँकी रहेको बताए । उनले आइतबारसम्ममा सिट बाँडफाँटको टुङ्गो लाग्ने दावी गरे । उनले एमाले, राप्रपा र पाँच दलीय गठबन्धनकाबीचमा चुनाव हुने बताए ।

उनले मुलुकमा बाम एकताको खाँचो रहेपनि केही व्यक्तिका कारण पूरा हुन नसकेको समेत बताए । नेता खनालले बाम शक्ति विभाजन हुनु दुःखद भएको भन्दै एकता नहुँदा अवसरहरू गुमाउँदै गएको उल्लेख गरे ।

अहिले विवादमा परेको नागरिकता विधेयक तत्कालीन प्रधानमन्त्री केपी शर्मा ओलीको पालामा बनेको पनि बताउनुभयो । उहाँले विधेयकका सम्बन्धमा राष्ट्रपति विद्यादेवी भण्डारीले खेलेको भूमिकाप्रति आपत्ति जनाउनुभयो ।