निर्वाचनका लागि देशभर १० हजार आठ सय ८८ मतदानस्थल कायम

काठमाडौँ। निर्वाचन आयोगले मंसिर ४ गते हुने प्रतिनिधिसभा र प्रदेशसभा सदस्यको निर्वाचनका लागि देशभर १० हजार आठ सय ८८ मतदानस्थलको संख्या कायम गरेको छ। वैशाख ३० गते भएको स्थानीय तह निर्वाचनमा १० हजार सात सय ५६ मतदानस्थल थिए।

आयोगले मतदानस्थल तथा मतदान केन्द्र निर्धारण कार्यविधि, २०७७ बमोजिम मतदान व्यवस्थापनलाई प्रभावकारी बनाउन तथा मतदातालाई मतदान प्रक्रियामा सहज पहुँचका लागि मतदाताको संख्या, सुविधा एवं सुरक्षाको अवस्था समेतलाई ध्यानमा राखी केही मतदानस्थल पुनरवलोकन गरेको छ।

कार्यविधिमा भएको व्यवस्थाबमोजिम ०७९ साउन १ गतेदेखि मतदानस्थल पुनरवलोकन कार्यक्रम सञ्चालन गरी मतदाताको सघनता, मतदानस्थलसम्मको पहुँच, भवन, सञ्चार, विद्युत्, यातायातलगायत पूर्वाधारको अवस्था, सुरक्षा एवं भौगोलिक अवस्था र निर्वाचनका सरोकारवालाको सहमतिका आधारमा जिल्ला मतदानस्थल तथा मतदान केन्द्र सिफारिस समितिबाट प्राप्त सुझावका आधारमा पुनरवलोकन गरिएको हो।

सोही आधारमा जिल्लाभरका मतदानस्थल पुनरवलोकन हुँदा एक हजार एक सय २३ मतदानस्थलको त्रुटि सच्याइएको, साविकका तीन सय ६५ मतदानस्थलबाट सबै मतदाता स्थानान्तरण गरी तीन सय ६४ मतदानस्थल निर्धारण गरिएको छ।

एक सय ६३ मतदानस्थलबाट आंशिक मतदाता स्थानान्तरण गरी एक सय ६९ मतदानस्थल निर्धारण गरिएको साथै २८ मतदानस्थलका सबै मतदातालाई २८ वटै मतदानस्थलमा र १५ मतदानस्थलका आंशिक मतदातालाई स्थानान्तरण गरी १३ वटा मतदानस्थलमा गाभिएको छ।

आयोगका प्रवक्ता शालिग्राम शर्मा पौडेलका अनुसार देशभरका मतदानस्थलको संख्या १० हजार आठ सय ८८ पुगेको छ। यसअघि देशभरका जम्मा १० हजार सात सय ५६ मतदानस्थल थिए। मतदानस्थल पुनरवलोकन गर्दा देशभरका चार सय एक मतदानस्थललाई हटाई नयाँ मतदानस्थल निर्धारण गरिएको छ।

मतदानस्थल पुनरवलोकन भएपश्चात् स्थानीय तह निर्वाचन, २०७९ को समयमा मतदान गर्न बास बस्नुपर्ने, निकै टाढा–टाढासम्म हिँड्नुपर्नेलगायत गुनासो सम्बोधन भई मतदातालाई मतदानस्थलसम्मको पहुँच सहज भई निर्वाचनमा मतदाताको सहभागिता अझ बढ्ने अपेक्षा आयोगले गरेको छ।