लागूऔषधसहित ३ जनालाई पक्राउ

काठमाडौं । कास्कीको पोखरा र बाराको पथलैयाबाट प्रहरीले लागूऔषधसहित ३ जनालाई पक्राउ गरेको छ । पोखरा महानगरपालिका–३० स्थित पावरहाउस चोकबाट पक्राउ पर्नेमा लामाचौर घर भएका २२ वर्षीय अजय जिसी र चितवन घर भएका २५ वर्षीय समिर कोइराला छन् ।

वडा प्रहरी कार्यालय गगनगौंडाबाट खटिएको प्रहरीले भैरहवाबाट पोखरातर्फ आउँदै गरेको लु१ ख ८१५७ नम्बरको बसमा सवार अजयको साथबाट नुर्फिन ७० एम्पुल, सोही परिमाणमा डाईजेपाम र फेनारगन बरामद गरेको छ ।

नारायणगढबाट पोखरा जाँदै गरेको ग.१ ख ३०६५ नम्बरको हाइसमा सवार समिरको साथबाट नुर्फिन १ सय एम्पुल, डाइजेपाम १ सय एम्पुल र सोही परिमाणमा फेनारगन बरामद गरिएको जिल्ला प्रहरी कार्यालय कास्कीले जनाएको छ ।
 
बारा जिल्लाको जितपुरसिमरा उपमहानगरपालिका–१ पथलैयाबाट पक्राउ पर्नेमा सिन्धुली घर भएका २४ वर्षीय पूर्ण प्रसाद दाहाल छन् । उनको साथबाट नाइट्रभेट ३ सय ट्याब्लेट सहित फेनारगन, नुर्फिन र डाइजेपाम बरामद गरिएको जिल्ला प्रहरी कार्यालय बाराले जनाएको छ । आरोपीको साथबाट प्रहरीले १ हजार ६ सय ६० पिस लागुऔषध बरामद गरेको छ । उनि बसमा कलैयाबाट काठमाडौं तर्फ जाँदै थिए ।