हाँसेको भन्दै विद्यार्थीलाई शिक्षकले हाने चट्कन, लगियो अस्पताल

काठमाडौं । बुटवलको दिप बोर्डिङ हाई स्कूलका शिक्षकले १० कक्षामा पढ्ने विद्यार्थीलाई कुटपिट गरेका छन् । विद्यालयका कम्प्युटर शिक्षक एकराज गुरागाईले विद्यार्थी जेनित रायमाझीलाई कानमा हानेको अभिभावकले बताएका छन् ।

तिलोत्तमा–५ घर भएका जेनितले कक्षा कोठामा हाँसेको भन्दै शिक्षकले चट्कन हानेको अभिभावक चन्दा रायमाझीले बताइन् । शारीरिक सजाय दिन नपाइने भए पनि विद्यालयका शिक्षकले पटक–पटक विद्यार्थीलाई कुटपिट गरेकाले विद्यार्थीहरू असुरक्षित भएका उनको भनाई छ ।

शिक्षकको कुटाइबाट घाइते भएका जेनितलाई अभिभावकले लुम्बिनी हस्पिटल एण्ड टेक्निकल कलेज प्रालिमा उपचार गराएका थिए । अभिभावकका अनुसार जेनितलाई १५ दिन आराम गर्न चिकित्सकले सुझाएका छन् ।

उपचारका क्रममा उनको बंगारामा असर पुगेको चिकित्सकले बताएको अभिभावक चन्दा रायमाझीले बताइन् । विद्यालयका प्राचार्य टीकाराम न्यौपानेले आफूलाई पनि विद्यार्थीलाई कुटपिट भएको जानकारी आएको र यसबारे थप बुझ्ने प्रयास भइरहेको बताए ।