चितवनमा १५ जना कोरोना संक्रमित थपिए , एकजनाको मृत्यु

चितवन । चितवनमा पछिल्लो २४ घण्टामा १५ जनामा कोरोना भाइरस संक्रमण पुष्टि भएको छ । जिल्लाभर ७५ जनामा परीक्षण गर्द १५ जनाको रिपोर्ट पोजेटिभ आएकोक हो ।

६३ पिसिआर परीक्षणबाट १२ तथा १२ एन्टिजेन परीक्षणबाट तीन जनामा संक्रमण पुष्टि भएको स्वास्थ्य कार्यालय चितवनले जानकारी दिएको छ । यससँगै चितवनमा कोरोनाको सक्रिय संक्रमित संख्या ७९ पुगेको छ ।

सोही अवधिमा कोरोना संक्रमणबाट एक जनाको मृत्यु भएको स्वास्थ्य कार्यालयले जनाएको छ । मृत्यु हुनेमा पूर्वी चितवनको खैरहनी नगरपालिकाका ४७ वर्षका पुरुष रहेका छन् । उनको भरतपुर अस्पतालमा उपचारका क्रममा ज्यान गएको हो ।

कोरोनाका कारण निमोनिया भई अक्सिजनको तह घटेर उनको मृत्यु भएको अस्पतालले जनाएको छ । यससँगै चितवनमा हालसम्म कोरोनाबाट मृत्‍यु हुनेको संख्या चार सय ५० पुगेको छ ।

उता पछिल्लो २४ घण्टामा १८ जना निको भएका छन् । हाल ७३ जना सक्रिय संक्रमित होम आइसोलेसनमा छन् । तीन जनाको अस्पतालमा उपचार भइरहेको छ । चितवनमा अहिलेसम्म ३३ हजार ७५५ जनामा कोरोना पुष्टि भइसकेको छ । उनीहरु मध्ये ३३ हजार २२५ जना निको भएका छन् ।