२२ अर्ब ६० करोडको ट्रेजरी बिल बोलकबोल गर्दै राष्ट्र बैंक

काठमाडौं । नेपाल राष्ट्र बैंकले सोमबार २२ अर्ब ६० करोड रुपैयाँ बराबरको ट्रेजरी बिल बोलकबोल गर्ने भएको छ । बैंकले ९१ दिने, १८२ दिने र ३६४ दिने गरी तीन किसिमका कुल २२ अर्ब ६० करोड रुपैयाँको ट्रेजरी बिल बिक्री गर्न लागेको हो ।  सोमबार अर्थात् असार २७ गते दिउँसो ३ बजे बोलकबोल हुने ट्रेजरी बिलको बिक्री भने असार २८ गते हुनेछ । 

इच्छुक बैंक तथा वित्तीय संस्था लगायत निजी कम्पनी, फर्म र व्यक्तिले समेत बिल खरिदका लागि आवेदन दिन सक्नेछन् ।  बैंकका अनुसार ९१ दिनका लागि ८ अर्ब रुपैयाँ छुट्याइएको छ भने १८२ दिनका लागि ६ अर्ब रुपैयाँ र ३६४ दिनका लागि ८ अर्ब ६० करोड रुपैयाँ छुट्याइएको छ । 

खुल्ला प्रतिस्पर्धात्मक प्रणालीबाट बाँडफाँड हुने ट्रेजरी बिलको अधिकतम अर्थात् ८५ प्रतिशत प्रतिस्पर्धात्मक प्रणाली बाटै र बाँकी १५ प्रतिशत भने विना प्रतिस्पर्धा बाँडफाँड गरिने बैंकले जनाएको छ ।