अमेरिकी फास्ट फुड कम्पनी म्याकडोनल्ड्सले रुसमा आफ्नो व्यापार सधैँका लागि बन्द गरेको घोषणा गरेको छ ।
कम्पनीलाई उद्धृत गर्दै बीबीसीले जनाएअनुसार युक्रेन युद्धका कारण सिर्जित ‘मानवीय संकट’ तथा ‘अनपेक्षित काम गर्ने वातावरण’ का यस्तो निर्णय लिइएको हो ।यसअघि गत मार्च महिनामा कम्पनीले छोटो समयका लागि भन्दै ८५० वितरण केन्द्र बन्द गरेको जनाएको थियो ।‘यो निकै जटिल विषय हो यति ठूलो परिणामसहित यसअघि यस्तो कहिल्यै भएको थिएन’ कम्पनीका प्रमुख कार्यकारी क्रिस कम्पस्जिन्स्कीलाई उद्धृत गर्दै बीबीसीले जनाएको छ ।
म्याकडोनल्ड्सले अब आफ्ना सबै व्यापारिक संरचनालाई स्थानीय खरिदकर्तालाई बेच्ने जनाएको छ । यद्यपि कम्पनीले रुसमा आफ्नो ट्रेडमार्क भने सुरक्षित राख्नेछ ।कम्पनीले रुसमा कार्यरत आफ्ना ६२ हजार कामदारको भविष्यप्रति ढुक्क हुन चाहेको जनाएको छ । यसका लागि केही बिक्री नहुन्जेलसम्म पारिश्रमिक दिइरहने कम्पनीले जनाएको छ ।
यसबाहेक सम्भावित खरिदकर्ताले ती कामदारहरुको भविष्यको रोजगारीको व्यवस्था गर्नका लागि पहल गर्ने समेत म्याकडोनल्ड्सले जनाएको छ ।म्याकडोनल्ड्स कम्पनीले ३० वर्षदेखि लगातार रुसमा व्यापार गर्दै आएको थियो । सर्वप्रथम तत्कालीन सोभियत संघको राजधानी मस्कोमा सन् १९९० मा स्थापित म्याकडोनल्ड्सले शीत युद्धमा सांकेतिक छाप छाडेको बताइन्छ ।त्यसको एक वर्षपछि सोभियत संघ विघटन हुन पुगेको थियो ।
केही समयअघिमात्र रुसले फ्रान्सेली कार कम्पनी रेनोलाई राष्ट्रियकरण गर्ने घोषणा गरेको थियो ।म्याकडोनल्ड्सले पनि रुसमा आफ्ना व्यापार सधैँका लागि बन्द गर्ने घोषणालाई निकै चासोपूर्वक हेरिएको छ ।
प्रतिक्रिया दिनुहोस
सफल खबर संवाददाता
मंगलबार, ०३ जेठ २०७९, १४ : १६
लेखकबाट थप