पूर्वगृहमन्त्री गुरुङसम्बन्धी छानबिन आयोगमाथि निगरानी आवश्यक’ : सांसद साह

काठमाडौँ । नेपाली काँग्रेसका सांसद अभिषेक प्रताप साहले पूर्वगृहमन्त्री सुधन गुरुङमाथि भइरहेको छानबिन प्रक्रियालाई निष्पक्ष र पारदर्शी बनाउन गठित आयोगको गतिविधिमाथि निगरानी आवश्यक रहेको बताएका छन्।

प्रतिनिधि सभाको आकस्मिक समयमा धारणा राख्दै सांसद साहले आयोगले प्रभाव र दबाबमुक्त ढंगले काम गर्नुपर्ने उल्लेख गरे। उनले पूर्वगृहमन्त्री गुरुङको सम्पत्तिमाथि उच्चस्तरीय र पारदर्शी अनुसन्धान हुनुपर्ने मागसमेत गरेका छन्।

सांसद साहले छानबिन प्रक्रियाबारे जनस्तरमा विभिन्न आशंका र टिप्पणी उठिरहेको उल्लेख गर्दै आयोगले कसैलाई उन्मुक्ति दिने वा संरक्षण गर्ने ढंगले काम गर्न नहुने धारणा राखेका छन्।

उनले सार्वजनिक पदमा रहेका वा रहिसकेका व्यक्तिहरू कानुनभन्दा माथि हुन नसक्ने बताउँदै आयोगले निष्पक्षता कायम राख्नुपर्ने आवश्यकता औँल्याए।