मानव बेचबिखनमा संलग्न समूहविरुद्ध कडा कारबाही गर्न राप्रपाको माग

काठमाडौँ । राप्रपा सांसद खुश्बु ओलीले वैदेशिक रोजगारीको नाममा भइरहेको मानव बेचबिखनमा संलग्न गिरोहलाई तत्काल नियन्त्रणमा लिएर कानुनी कारबाही गर्न सरकारसँग माग गरेकी छन्।

प्रतिनिधि सभाको बैठकमा आकस्मिक समय लिएर बोल्दै उनले विशेष गरी कुवेतलगायत खाडी मुलुकमा नेपाली महिलालाई अवैध रूपमा पठाई ठुलो रकममा बेचबिखन गर्ने कार्य भइरहेको दाबी गरिन्।

उनले कुवेतमा रहेको भनिएकी शर्मिला दर्जीको खोजी तथा उद्धारका लागि नेपाल सरकारले तत्काल पहल गर्नुपर्ने आवश्यकता औँल्याइन्।

प्रमुख सचेतक ओलीले मानव बेचबिखनका घटनाहरूलाई एकल घटनाका रूपमा मात्र हेर्न नहुने बताउँदै सन् २०१७ देखि नेपाल सरकारले घरेलु कामदारका रूपमा महिलालाई विदेश पठाउन लगाएको प्रतिबन्ध प्रभावकारी हुन नसकेको टिप्पणी गरिन्।