नेप्सेमा ४१ अंकको गिरावट, १ अर्ब ५३ करोडको कारोबार

काठमाडौं । नेपाल स्टक एक्सचेञ्ज (नेप्से)मा ४१ अंकको गिरावट आएको छ । कारोबार समयदेखि घट्न थालेको नेप्से परिसूचक ४१ अंक ओरालो लागेर बन्द भएको हो । यससँगै सेयर बजार परिसूचक २३ सय ४३ अंकमा आइपुगेको छ ।

यसक्रममा आज नेप्सेमा १ अर्ब ५३ करोड रुपैयाँ बराबरका ३८ लाख ७६ हजार कित्ता सेयर किनबेच भएको छ । यस्तै, आज कारोबार भएका सबै १३ वटै समूहमा गिरावट आएको छ । जसमध्ये निर्जीवन बीमा कम्पनी समूह ३४२ अंकले घटेको छ भने जीवन बीमा समूहमा २६३ अंकको गिरावट आएको छ ।

यसैगरी, उत्पादनमूलक समूहमा ९३ अंकको गिरावट आउँदा जलविद्युत समूह ८० अंकले र विकास बैंक समूह ६९ अंकले घटेको छ । यसका साथै, वित्त समूहमा ६२ अंक र अन्य समूहमा ५२ अंकको गिरावट आएको छ ।

बजार ४१ अंकले घट्दा नेष्डो लघुवित्त वित्तीय संस्थाको सेयर मूल्य १० प्रतिशतले बढेको छ । कम्पनीको सेयर मूल्य आज एकै दिन प्रतिकित्ता २४८ रुपैयाँले बढ्दै २७ सय ३७ रुपैयाँ पुगेको छ । एनआरएन इन्फ्रास्ट्रक्चर एण्ड डेभलपमेन्टको सेयर मूल्य ८ प्रतिशतले घटेको छ ।