विद्यालय सञ्चालनको तयारी

काठमाडौं । गत चैत महिनाको अन्तिम सातादेखि बन्द  रहेका  प्रदेश  २  का  विद्यालय  छ  महिनापछि  सञ्चालनको  तयारी  भइरहेको  छ  ।  कोरोना  भाइरस  सङ्क्रमण  तीव्र  रूपमा  फैलिएकाले  बालबालिका  उच्च  जोखिममा  पर्न  सक्ने  भएपछि  सरकारले  विद्यालय बन्द गरेको थियो ।  

सो  अवधिमा  भौतिक  उपस्थितिमा  कक्षा  सञ्चालनमा  रोक  लगाएको  भए  पनि  वैकल्पिक  विधि  वा  उपाय  अपनाएर  केही   विद्यालयले   भने   शिक्षण   कार्य   अनलाइनमार्फत  खुला  नै गरेका थिए ।  प्रविधिको   सुविधा   र   पहुँच   सबै   विद्यालयसँग नरहनु, अधिकांश सामुदायिक र  संस्थागत  विद्यालयमा  इन्टरनेट  सुविधा  नहुनु,  सुविधा  भएपनि  विद्यालयमा  दक्ष  जनशक्तिको  अभावले  कतिपय  विद्यालयले  पठनपाठन गर्न नसकेको जनाइएको छ ।

प्रविधिसँग  खेल्न  सक्ने  र  यस्तो  सुविधा  भएका  विद्यालय  कम,  अनलाइन  कक्षा   सञ्चालन   गर्न   सकिने   स्रोत   साधन  एवं  जनशक्ति  नभएका  कारण  छ  महिनादेखि   कक्षा   शिक्षण   पूर्ण   रूपमा   प्रभावित   भएको   थियो   ।   जसले   गर्दा   बालबालिकाको   शैक्षिक   स्तर   खस्किँदै   गएको   पनि   अभिभावक,   शिक्षक   एवं   सरोकारवालाले बताउन थालेका छन् ।

शैक्षिक  स्तर  उकास्न   प्रदेशले  भौतिक  उपस्थितिमा  कक्षा  सञ्चालन  गर्न  आवश्यकता   बोध   गरी   सप्तरी,   सिरहा,   धनुषा,  सर्लाहीलगायतका  जिल्लामा  स्वास्थ्य  मापदण्ड   पालना   गरेर   कक्षा   सञ्चालन   गर्ने  तयारी  भइरहेको  जनाइएको  छ  भने  केही  जिल्लामा  विद्यालय  सञ्चालनमा  पनि  आइसकेकाले  सबै  सञ्चालनमा  ल्याउनुपर्ने  बताउन थालिएको खबर गोरखापत्रमा छापिएको छ ।