एमाले महाधिवेशन आयोजक कमिटीको बैठक बालुवाटारमा बस्दै

काठमाडौं । नेकपा (एमाले) दशौं महाधिवेशन आयोजक कमिटीको बैठक आज  बस्दैछ । प्रधानमन्त्रीको सरकारी निवास बालुवाटारमा ११ बजे बैठक बस्ने तयारी भएको एमाले पार्टी कार्यालयले जनाएको छ । 

बैठकले केन्द्रीय कमिटीको बैठक बोलाउने र महाधिवेशन आयोजक कमिटीलाई केन्द्रीय कमिटीमा रुपान्तरण गर्ने निर्णय भएको  पार्टी कार्यालय सचिव शेरबहादुर तामाङ नेताले बताए ।

नेकपा एमाले र माओवादी केन्द्रको एकता बदरबारे सर्वोच्च अदालतले गत फागुन २३ गते फैसला गरेपछि एमालेले महाधिवेशन आयोजक कमिटी गठन गरेको थियो ।

अध्यक्ष र महासचिवबाहेक सबै पदाधिकारीलाई सदस्यमा रुपान्तरण गरेपछि नेता माधवकुमार नेपाल पक्षका नेताहरु असन्तुष्ट रहँदैआउनुभएको छ । तर एमाले स्थायी कमिटीको मंगलबार बसेको बैठकले साविक एमालेको संरचनामा २०७५ जेठ २ अघि फर्कने निर्णय गरेको थियो ।

२०७५ जेठ ३ गते दुई पार्टीको एकता भएपछि पार्टीको सांगठनिक नयाँ संरचना बनेको थियो । तर सर्वोच्चको फैसलापछि दुई दल अलग भएका थिए । एमालेले असार १८ गते शुक्रबारका लागि केन्द्रीय कमिटी बैठक आव्हान गरिसकेको छ । जुन बैठक जेठ २ अघिको हैसियतमा बस्ने भनिएको छ ।