भारतमा थप ४५ हजार नयाँ कोरोना संक्रमित थपिए, ८ सय १६ जनाको मृत्यु

एजेन्सी । भारतमा कोरोना संक्रमण ओरालो लाग्दै जाने क्रममा पछिल्लो चौबिस घंटामा थप ४५ हजारमा नयाँ कोरोना भाइरसको संक्रमित भेटिएका छन् ।   

दुई महिना अघिसम्म लगातार ४ लाख संक्रमित हुँदै आएकोमा पछिल्लो २४ घण्टामा भारतमा ४५ हजार ६९९ जनामा संक्रमण भएको छ । भारतमा संक्रमितको दैनिक वृद्धि एक लाखभन्दा कम भएको यो लगातार २३औँ दिन हो ।

यसअघि भारतमा पहिलो पटक १८ वैशाखमा कोरोना संक्रमितको दैनिक वृद्धि ४ लाख नाघेको थियो । पछिल्लो वृद्धिसँगै भारतमा संक्रमितको संख्या ३ करोड ३ लाख ६१ हजार ६९९ पुगेको छ ।  भारतमा हाल ५ लाख ४३ हजार ७१८ जना संक्रिय संक्रमित छन् । 

यस्तै त्यहाँ एकै दिन ८१६ संक्रमितको मृत्यु भएको छ । पछिल्लो विवरणसँगै भारतमा कोरोनाले मृत्यु हुनेको संख्या ३ लाख ९८ हजार ४८४ पुगेको छ ।