पार्टीका दुबै पक्षको चरित्रका कारण एकतामा समस्या भयो : योगेश भट्टराई

काठमाडौं । नेकपा एमालेका नेता योगेश कुमार भट्टराईले पार्टीभित्रै सहकार्य नगरी बाहिरी दलसँगको सहकार्य गर्ने पार्टीका दुबै पक्षको चरित्रका कारण एकतामा समस्या भएको ठहर गरेका छन् । उनले यस्तो कसले, किन  र केका लागि गर्दैछ भन्दै प्रश्न समेत गरेका छन् । 

‘कमरेड केपी ओली आफ्नै पार्टीका वरिष्ठ नेता कमरेड जेएन खनाल र कमरेड माधव नेपालसँग सहकार्य गर्न तयार नहुने तर महन्त ठाकुर र राजेन्द्र महतोसँग सत्ता साझेदारी र अन्य बिषयमा गठबन्धन गर्न तयार हुने’, उनले सामाजिक सञ्जालमा भनेका छन्, ‘कमरेड जे एन खनाल र माधव नेपाल आफ्नै पार्टीका अध्यक्ष कमरेड केपी ओलीसँग मिल्न तयार नहुने तर शेर बहादुर देउवा, प्रचण्ड र उपेन्द्रसँग सत्ता साझेदारी र अन्य विषयमा गठबन्धन गर्न तयार हुने । कसले, किन  र केका लागि गर्दैछ यो सब ?’ 

एमाले एकताको समस्याको मुल जड यही भएको ठोकुवा गर्दै यस बिषयमा नेताहरुबीचमा गम्भीर छलफल भइ साझा निष्कर्षमा पुगेर  एकता बचाउनुपर्नेमा उनले जोड दिएका छन् ।