भारतमा कोरोना संक्रमणबाट मृत्यु हुनेको संख्या अहिले सम्मकै धेरै, २४ घंटामा ४ हजार ५२९ जनाको गयो ज्यान

एजेन्सी । कोरोनाको हटस्पट बनेको भारतमा केही दिन यता कोरोना संक्रमितको संख्या केही ओरोलो लागेपनि मृतकको संख्या भने दिनप्रति दिन बढ्दै गएको छ ।  मंगलबार एकै दिन अहिलेसम्मकै धेरै जनाको कोभिड–१९ का कारण ज्यान गएको छ ।

भारतको केन्द्रीय स्वास्थ्य मन्त्रालयका अनुसार पछिल्लो २४ घण्टामा कोभिड–१९ बाट ४ हजार ५२९ जनाको ज्यान गएको छ। महामारी सुरु भएयता भारतमा एकै दिन पहिलोपटक यति धेरैको मानिसको मृत्यु भएको हो ।

संक्रमितको संख्या भने केही कम देखिएको छ विगतका दिनको तुलनामा । पछिल्लो २४ घण्टामा भारतमा २ लाख ६७ हजार ३३४ जना नयाँ संक्रमित थपिएका छन् । 

भारतमा कुल संक्रमितको संख्या दुई करोड ५४ लाख ९६ हजार भन्दा बढि र मृत्यु हुनेको संख्या दुई लाख ८३ हजार २४८ पुगेको छ। हाल सक्रिय संक्रमितको संख्या ३२ लाख २६ हजार सात सय भन्दा धेरै छ । अहिलेसम्म भारतमा १८ करोड ५८ लाख ९ हजार भन्दा धेरैले कोरोना भाइरसविरुद्धको खोपको कम्तीमा एक मात्रा लगाएका छन्।