राष्ट्रपतिले दिएको नयाँ सरकार गठनको समयसीमा आज सकिँदै, बन्ला त विपक्षी दलहरुको बहुमतको सरकार !

काठमाडौं । प्रधानमन्त्री केपी शर्मा ओलीले विश्वासको मत लिन नसकेपछि राष्ट्रपति विद्यादेवी भण्डारीले विपक्षी दलहरुलाई आव्हान गरेको बहुमतको सरकार गठनका लागि दिएको समयसीमा आज सकिँदैछ ।

 राष्ट्रपति भण्डारीले दिएको समयसिमा भित्र विपक्षी दलहरुले आज राति ९ बजे भित्र दुई वा दुई भन्दा बढी दलहरु मिलेर बहुमतको सरकार बनाउने दाबी पेश गर्नुपर्ने हुन्छ । तर बुधबार (हिजो) सम्म विपक्षी दलहरुले यसको तारतम्य मिलाउन खोजेपनि खासै उपलब्धी हासिल गर्न सकेनन् । सोविपक्षी दल नेपाली काँग्रेस, माओवादी केन्द्र र जसपाको उपेन्द्र यादव पक्ष आज बहुमत पुर्याएर नयाँ सरकारका लागि राष्ट्रपतिसामू दाबी पेश गर्ने तयारीमा लागेका छन् ।

यसका लागि काँग्रेस सभापति शेरबहादुर देउवाले माओवादी केन्द्रका अध्यक्ष पुष्पकमल दाहाल प्रचण्ड, जसपा अध्यक्ष उपेन्द्र यादव, एमालेका नेता माधव नेपाल लगायतसँग संवाद जारी राखेको छ। काँग्रेस, जसपा र एमालेको नेपाल पक्षभित्र यस विषयमा आन्तरिक छलफल पनि जारी छ ।  तर जसपाका अध्यक्ष महन्थ ठाकुर र वरिष्ठ नेता राजेन्द्र महतो यो गठबन्धनलाई  बहुमत पुग्न नदिने रणनीतिमा लागेपछि  राष्ट्रपतिले आव्हान गरेबमोजिम संविधानको धारा ७६ (२) को सरकार  बन्न  नसक्ने हो कि अड्कलबाजी हुन थालेको छ ।

जसपा का संघिय परिषद अध्यक्ष बाबुराम भट्टराईले पार्टीको एकीकृत नीति बनाउन छलफलमा जुटेका छन् । यता नेपाल पक्ष पनि सांसद पदबाट राजीनामा दिने अन्तिम तयारीमा छ । जसपाको ठाकुर महतो पक्षलाई नयाँ सरकार निर्माणमा सहमत गराउन नसके नेपाल पक्षको राजीनामाको सहारामा बहुमत पुर्याउने विपक्षीको रणनीति देखिन्छ ।  बिहीबार राति ९ बजेसम्म वैकल्पिक गठबन्धन सरकारको दाबी नपुगे राष्ट्रपति भण्डारीले संसदको ठूलो दलको हैसियतले संविधानको धारा ७६  (३) अनुसार केपी ओलीलाई नै अल्पमतको प्रधानमन्त्री नियुक्ति गर्नेछिन् ।  

देउवाकै नेतृत्वमा बहुमत पुर्‍याउन बिहीबार साँझसम्म प्रयत्न गरिने काँग्रेस संसदीय दलका प्रमुख सचेतक बालकृष्ण खाणले जानकारी दिए । तर ओलीले फेरि पनि ३० दिन भित्र विश्वासको मत लिनुपर्छ । विपक्षीको अहिले अहिलेसम्मको स्थितिलाई हेर्दा ओलीको पक्षमा विश्वासको मत पुग्ने देखिंदैन । संसदमा कसैको पनि बहुमत नपुग्ने स्थिति आएमा संसद विघटन गरी देश पुनः चुनावमा धकेलिने नेताहरु बताउँछन् । 

नेताहरुले छलफल सकारात्मक ढंगले नै अगाडि बढिरहेको छ । अन्तिम बेलासम्म जे पनि हुन सक्छ ।  ‘हामीले विभिन्न माध्यमबाट सबै पक्षसँग कुराकानी गरिरहेका छौं ।’–एक नेताले भने ।