भारतमा कोरोना संक्रमण झनै भयावह, २४ घंटामा ३ लाख ६२ हजार बढीमा संक्रमण

एजेन्सी । भारतमा २४ घंटाको अन्तरालमा ३ लाख ६२ हजार ७८७ नयाँ कोरोना संक्रमित थपिएका छन् । केही दिन यता भारतमा दिनहुँजसो ३ लाख बढी संक्रमित थपिदैं गएका छन् । सोमबार नयाँ संक्रमितको संख्यामा केही कमी रहे पनि मंगलबार यो संख्याले पुनः निरन्तरता पाएको छ ।

मंगलबार कोरोना संक्रमणका कारण भारतमा ३ हजार २८५ जनाको मृत्यु भएको छ । मृत्यु हुनेमध्ये धेरैजसो महाराष्ट्रका छन् । महाराष्ट्रमा मात्र ८९५ जनाको मृत्यु भएको छ । यस्तै दिल्लीमा ३८१, उत्तरप्रदेशमा २६४, छत्तीसगढमा २४६, कर्नाटकमा १८०, गुजरातमा १७० र झारखण्डमा १३१ जनाको मृत्यु भएको छ ।

भारतमा मंगलबारसम्म कुल संक्रमितको संख्या एक करोड ७९ लाख ८८ हजार ६३७ पुगेको छ । कोरोना संक्रमणका कारण भारतमा हालसम्म दुई लाख एक हजार १६५ जनाको मृत्यु भएको छ ।