आईपीएल : बेंगलोरको लगातार तेस्रो जित

काठमाडौं । जारी आइपीएलमा रोयल च्यालेन्जर्स बेंगलोरले लगातार तेस्रो जित दर्ता गरेको छ । आइतबार भएको पहिलो खेलमा बेंगलोरले कोलकता नाइट राइडर्सलाई ३८ रनले पराजित गरेको हो ।

चेन्नईमा बेंगलोरले दिएको २०५ रनको लक्ष्य पछ्याएको कोलकताले निर्धारित २० ओभरमा ८ विकेट गुमाएर १६६ रन मात्र बनाउन सक्यो । कोलकताका लागि आन्द्रे रसेलले सर्वाधिक ३१ रन बनाए भने कप्तान आयोन मोर्गनले २९, शकिब अल हसनले २६, राहुल त्रिपाठीले २५ र शुभमन गिलले २१ रन बनाए ।

बेंगलोरका लागि केल जेमिसनले सर्वाधिक ३ विकेट लिए । यस्तै हर्सल पटेल र युजभेन्द्र चहलले २-२ विकेट लिए । टस जितेर पहिले ब्याटिङ गरेको बेंगलोरले निर्धारित २० ओभरमा ४ विकेट गुमाएर २०४ रन बनाएको थियो ।