कोरोना संक्रमण भयावह हुन नदिन सतर्कता अपनाऔं : प्रधानमन्त्री ओली

काठमाडौँ । प्रधानमन्त्री केपी शर्मा ओलीले कोरोना भाइरसको संक्रमण नकारात्मकतातिर गएको भन्दै भयावह हुन नदिन सतर्कता अपनाउनुपर्ने बताएका छन् । 

प्रधानमन्त्री निबास बालुवाटारमा बुधबार कोभिड–१९ सङ्कट व्यवस्थापन केन्द्रबाट प्रकाशित नेपालमा कोभिड–१९ महामारी र प्रतिकार्य प्रतिवेदन सार्वजनिकीकरण कार्यक्रममा प्रधानमन्त्री ओलीले यस्तो बताएका हुन् ।

उनले कोरोना भाइरसको संक्रमण पूर्णरूपमा नियन्त्रण नहुञ्जेलसम्म सामाजिक दूरी कायम राख्नुपर्नेमा जोड दिए । कोरोना पूर्णरूपमा नियन्त्रण नगरेसम्म खतरा रहिरहने भन्दै उनले सबै सचेत हुनुपर्ने बेला आएको जिकिर गरे ।

प्रधानमन्त्री ओलीले सरकारको निरोगी नेपाल स्वास्थ्य नीतिका कारण देशमा कोभिड–१९ को प्रभाव कम भएको दाबी गरे । उनले अहिले भयावहको स्थिति नभएको बताए ।