माओवादी केन्द्रको संसदीय दलको नेतामा प्रचण्ड चयन, सचेतकमा देव गुरुङ

काठमाडौं । अदालतले नेकपा एमाले र नेकपा माओवादी केन्द्रलाई पुरानै अवस्थामा फर्काएपछि आ–आफ्नो समूहले संगठनात्मक संरचनाहरु बनाइरहेका छन् । नेकपा माओवादी केन्द्रले पार्टी संसदीय दलको नेतामा अध्यक्ष पुष्पकमल दाहाल प्रचण्डलाई चयन गरेको छ ।

प्रमुख सचेतकमा देव गुरुङ चयन गरिएको छ । त्यस्तै राष्ट्रिय सभा संसदीय दलको दलको नेतामा दिनानाथ शर्मालाई चयन गरेको माओवादी केन्द्रले जनाएको छ ।

यसअघि नेकपा एमाले र माओवादी केन्द्रबीच एकता भएर बनेको पार्टी नेकपामा संसदीय दलको नेता केपी शर्मा ओली र प्रमुख सचेतक देव गुरुङ थिए । नेकपाको विवाद उग्र बनिरहँदा प्रधानमन्त्री केपी शर्मा ओलीले सचेतकबाट गुरुङलाई हटाएका थिए ।

सर्वोच्चको फैसलापछि एमाले र माओवादी केन्द्र ब्युँतिएपछि माओवादी केन्द्रले आफ्नो संसदीय दलको पदाधिकारी चयन गरेको हो । केन्द्रले संसदीय दलको उपनेता र सचेतक चयन गरेको छैन ।