गस्तीमा खटिएका एक प्रहरीको हत्या, अर्का बेपत्ता

काठमाडौँ । शनिबार राति मोटरसाइकलमा सँगै गस्तीमा निस्किएका दुई जना प्रहरीमध्ये एक जना मृत अवस्थामा भेटिएका छन् भने अर्का एक जना प्रहरी हालसम्म बेपत्ता छन् ।

राति ८ बजे अस्थायी प्रहरी पोष्ट जुगेडाबाट ड्युटी गएका एकजना प्रहरीको शव फेला परेको सुदूरपश्चिम प्रदेश प्रहरी कार्यालयका प्रवक्ता एसएसपी मुकेशकुमार सिंहले बताए । उनका अनुसार नियमित गस्तीमा गएका असई गोविन्द विकको शव धनगढी उपमहानगरपालिका-११ को मोहना खोलामा भेटिएको हो । उनको साथमा रहेका प्रहरी जवान रामबहादुर साउद बेपत्ता छन् ।

ड्युटी सकेर फर्किने समयमा पनि नआएपछि राति नै उनीहरूको खोजी खोजी गर्दा शव फेला परेको हो । शव फेला परेको ठाउँ नेपाल–भारत सिमना नजिकै पर्छ । तस्कर समूहले हत्या गरेको आशंकामा जिल्ला प्रहरी कार्यालय कैलालीले अनुसन्धान शुरु गरेको छ ।

प्रदेश प्रहरी कार्यालयका प्रमुख तथा प्रहरी नायव महाननिरीक्षक (डीआइजी) उत्तम सुवेदीसहितको प्रहरीको टोली घटनास्थल पुगेको छ ।  ‘यो घटना तस्करहरूले घटाएको प्रारम्भिक बुझाइ हाम्रो छ’ डिआइजी सुवेदीले भने । कसैले घेरा हालेर हत्या गरेको आशंका प्रहरीले गरेको छ । घटनाको विस्तृत विवरण आउन बाँकी छ ।