कोरोना विरुद्ध लड्न चीनले सहयोग गरेको सामग्री काठमाडौं आईपुग्यो

काठमाडौँ । कोरोना भाइरस (कोभिड–१९) विरुद्ध लड्न चीनले सहयोग गरेको रोकथाम तथा उपचारका लागि चाहिने विभिन्न सामग्री  आइतबार नेपाल आइपुगेको छ ।

चीनका विभिन्न राज्य तथा संगठनले प्रदान गरेका सुरक्षा सामग्री (पिपिई) सहित अत्यावश्यक सामग्रीको पहिलो लट लिन हिजो गएको विमान चीनको ग्वान्झाउबाट आज काठमाडौँ आएको हो ।

सिचुवान प्रान्त, सिचुवान प्रान्तीय लगानी समूह र चिनियाँ दूतावासले प्रदान गरेको पिपिईसहितका अत्यावश्यक सामग्रीसहितको विमान आइतबार बिहान अवतरण भएको हो ।

सो विमानमा ज्याक मा फाउन्डेसन र अलिबाबाले सहयोग स्वरुप प्रदान गरेका मास्कसहितका सुरक्षात्मक सामग्री पनि ल्याइएको छ । नेपाल एयरलाइन्सको विमानबाट चिकित्सकिय सुरक्षा सामग्री सहितको सामान नेपाल ल्याइएको हो ।