चितवन । नारायणी नदी किनारमा माघ ११ गतेदेखि सुरु भएको कोटिहोम महायज्ञले गति लिन सकेको छैन । मंगलबार बिहान १० बजेसम्म पनि एक सय आठ हवन कुण्डहरु खाली थिए । भक्तजनहरुको चहलपहल सुरु भएकै थिएन । मुख्य हवन कुण्डमा भने उद्घाटनकै दिनदेखि हवन चलिरहेको छ ।
कोटिहोम महायज्ञका प्रमुख वाचक एवं डिजाइनर बालयोगेश्वर उर्फ विजय भण्डारीका काला कर्तुतहरु मिडियामा आउन थालेपछि कोटिहोम महायज्ञ नै विवादमा तानिएको हो । आयोजक संस्था भरतपुर २३ स्थित पशुपति मन्दिर व्यवस्थापन समितिलाई यो महायज्ञ "नखाउँ भने दिनभरिको शिकार, खाउँ भने कान्छो बाबुको अनुहार" भनेजस्तो भएको छ ।
कोटिहोम महायज्ञमा प्रमुख वाचकको व्यासमा बसेर गुरु वशिष्ठले प्रवचन दिइरहेका छन् । उनको सहयोगीको रुपमा श्रवण गुरु र शेखर शर्मा पौडेलले प्रवचन दिने गरेका छन् । दैनिक एक हजार दुई सय जनाको हाराहारीमा भक्तजन आएको आयोजकको दाबी छ । वास्तविक भक्तजनको संख्या योभन्दा निकै कम छ ।
पत्रकार सम्मेलनमा चर्काचर्की
कोटिहोम महायज्ञमा प्रमुख वाचक फेरिएको विषयमा जानकारी दिन भन्दै मंगलबार बिहान महायज्ञस्थलमा आयोजित पत्रकार सम्मेलनमा आयोजक र पत्रकारबीच चर्काचर्की भएको छ । महायज्ञ आयोजकले जुन विषयमा पत्रकार सम्मेलन आयोजना गर्ने भनेका थिए, त्यस विषयमा कुनै जानकारी आएन । आयोजकले उल्टै पत्रकारहरुलाई "धर्मविरोधी" भन्दै बालयोगेश्वर उर्फ विजय भण्डारीका काला कर्तुतहरु मिडियामा आउनु भनेको "धर्ममाथिको आक्रमण" हो भनेपछि पत्रकारहरुले त्यसको प्रतिकार गरेका थिए ।
"कुनचाहिँ मिडियाले महायज्ञ हुनु हुँदैन, हिन्दू धर्म खराब हो भनेर लेखेका छन् ?" भनेर पत्रकार दीर्घाबाट कडा स्वरमा प्रश्न गरिएपछि आयोजकले "हामीले पत्रकारहरुलाई धर्मविरोधी भनेका छैनौँ" भनी प्रष्टीकरण दिएका थिए । बालयोगेश्वरलाई महायज्ञ आयोजकले अलग गरिसकेको छैन । उनी फरार नरहेको र उनको बारेमा मिडियामा आएका कुराहरुको छानबिन गर्न उनलाई प्रमुख वाचकको व्यासमा नराखिएको आयोजकको भनाइ छ ।
बालयोगेश्वरलाई ब्याक गराउने प्रयास
महायज्ञ आयोजक मूल समितिका संयोजक लालबहादुर दवाडीले महायज्ञलाई चुस्तदुरुस्त पार्ने प्रयास भइरहेको बताए । उनले बालयोगेश्वरलाई ब्याक गराउने कुरा छलफलको क्रममा रहेको जानकारी दिए । "हामी अहिले अत्यन्त पीडामा छौँ" उनले भने, "बालयोगेश्वरलाई ब्याक गराउने कुरा छलफलको क्रममा छ ।"
गतवर्ष पुसमा पार्वतीपुरस्थित भानु माध्यमिक विद्यालयले आयोजना गरेको महायज्ञमा बलयोगेश्वर उर्फ विष्णु प्रपन्नाचार्य उर्फ विजय भण्डारी प्रमुख वाचक थिए । उनले महायज्ञ आयोजक समितिबाट आफ्नो पारिश्रमिक वापत पच्चीस लाख रुपैयाँ लिएका थिए । एउटै महायज्ञबाट पच्चीस लाख रुपैयाँ लिएका बलयोगेश्वर उर्फ विष्णु प्रपन्नाचार्य उर्फ विजय भण्डारीले आफ्नो वार्षिक आम्दानी एक लाख रुपैयाँमात्र भएको बताउँदै कर छल्दै आएका छन् ।
सफल खबरलाई निस्तेज पार्ने धम्की
बलयोगेश्वर उर्फ विष्णु प्रपन्नाचार्य उर्फ विजय भण्डारीले कर छलेको विषयमा सफल खबर डट कमले समाचार प्रकाशित गरेपछि महायज्ञ आयोजक समितिले आक्रोश व्यक्त गरेको छ । महायज्ञका प्रवक्ता दिलिप न्यौपानेले पत्रकार सम्मेलनमै सफल खबरलाई पूर्णरुपमा "निस्तेज पार्ने" धम्की दिएका छन् । उनले तीन दिन अगाडिसम्म कान्तिपुरले ७२ लाख रुपैयाँको बार्गेनिङ गरेको र नपाएको झोँकमा समाचार लेखेको आरोप लगाए ।
महायज्ञका प्रवक्ता न्यौपानेले पैसाको कारणले मिडियाले उचाल्ने र थेचार्ने काम गरेको आरोप लगाए पनि त्यसलाई प्रमाणित गर्न सकेनन् । उनले बलयोगेश्वर उर्फ विष्णु प्रपन्नाचार्य उर्फ विजय भण्डारी फरार रहेको भन्ने समाचारको पनि खण्डन गरे । यसले के पुष्टि गर्छ भने महायज्ञ आयोजक समिति कथित बालयोगेश्वरलाई महायज्ञबाट अलग गराउने मनस्थितिमा छैन । जबसम्म महायज्ञबाट बालयोगेश्वर अलग हुने छैनन्, तबसम्म महायज्ञ सफल हुने देखिँदैन ।
प्रतिक्रिया दिनुहोस
सूर्यप्रकाश कँडेल
मंगलबार, १४ माघ २०७६, १४ : ३९
लेखकबाट थप
सम्बन्धित समाचारहरु
कृष्ण कँडेलले गरे शर्मिला श्रेष्ठविरुद्ध बेइज्जतीको मुद्दा दर्ता
चितवन काँग्रेसमा विवाद , जिल्ला सभापतिको कार्यशैली तानाशाह भएको आरोप
एनआरएनएको विवाद मिलाउन पाँच पदाधिकारी एक ठाउँमा
गैर आवासीय नेपाली संघको विवाद , साइबर क्राइमसम्म पुग्यो निवेदन
जसपा पर्सामा विवाद, बहुमत सदस्यले हटाए अध्यक्ष
८ बुँदे सहमतिपछि टुंगियो अखिल क्रान्तिकारीको विवाद