सभामुखमा प्रचण्डको अडान बलियो बन्दै, बालुवाटारमा निर्णायक वार्ता शुरु

काठमाडौं । अन्ततः तीन महिना यता रिक्त सभामुख चयनमा नेकपाका अध्यक्ष प्रचण्ड हावी हुने भएका छन् । अब सत्तारुढ दल नेकपामा उनले प्रस्ताव गर्ने नेता नै सभामुखका रुपमा उम्मेद्वार बन्ने करिव निश्चित भएको छ ।

यद्यपी यस सम्बन्धमा आजै पार्टीका अर्का अध्यक्ष तथा प्रधानमन्त्री केपी शर्मा ओलीसँग प्रचण्डले निर्णायक छलफल गरेपछि टुंगो लाग्ने भएको छ । ओलीसँगको छलफलका लागि प्रचण्ड अहिले प्रधानमन्त्री निवास बालुवाटार प्रवेश गरिसकेका छन् । 

५ दिन यताको सम्वादहिनता तोड्दै हिजो बिहिबार प्रधानमन्त्री निवास बालुवाटारमा भएको छलफलमा प्रधानमन्त्री ओली आफ्नो अडानमा लचिलो बन्ने संकेत देखिएपछि अब सभामुख पूर्व माओवादी धारकै नेताबाट हुने भएको छ । त्यसका लागि प्रचण्डले नामका विषयमा भने पहिले सभामुख पूर्व पार्टीका लागि दिन ओली तयार भएपछि मात्र प्रस्ताव गर्ने तयारी गरेको खुमलटार स्रोतले बताएको छ ।

प्रतिनिधीसभाको सभामुख नेकपाले चयन गर्न नसक्दा संसद बन्धक बनेको बन्यै छ । संविधानले प्रतिनिधीसभामा सभामुखविहिन अवस्थाको परिकल्पना गर्दैन । तर १४ असोजदेखि संसदमा सभामुख छैन । निर्वतमान सभामुख कृष्णबहादुर महरालाई वलत्कार प्रयासको आरोपमा पूर्पक्षका लागि जेल चलान गरेपछि संसदमा सभामुख विहिन अवस्था छ ।

अब यो अवस्थालाई ६ माघको बैठकबाट पछि धकेल्ने सोचमा सत्तारुढ नेकपा छैन । त्यस अगाडि नै पार्टीका तफबाट उम्मेद्वार चयन गर्ने, उपसभामुखलाई राजीनामा गराउने र ६ गतेको संसद बैठक जेष्ठ सदस्यका रुपमा राजपा नेता महन्थ ठाकुरलाई गराउने र सभामुख चयन प्रक्रियाका लागि अहिलेकी उपसभामुखले तयार पारेको कार्ययोजना अनुसारको प्रक्रिया अगाडि बढाउने गरी नेकपाले आन्तरिक तयारी थालिसकेको महासचिव विष्णु पौडेलले बताए ।

‘अब ढिला हँुदैन, ६ माघको संसद बैठकबाट सभामुख चयनको प्रक्रिया अगाडि बढ्छ, महासचिव पौडेलले भने,– ‘अध्यक्षदयले सचिवालयमा एउटै प्रस्ताव ल्याउनुहुन्छ, उहाँहरु करिव छलफलमा निर्णायक निश्र्कष नजिक पुगि सक्नुभएको छ ।’ 
४ पुसमा संसदको हिउँदे अधिवशेन शुरु भएयता संसदको अधिवेशन दुई पटक सूचना टाँस गर्दै सारेको सार्यै गरिएको छ । पार्टीभित्रै सभामुखमा कुरा नमिलेका कारण नेकपाले सार्वभौम संसदलाई नै बन्धक बनाएको भन्दै आलोचना बढेको थियो ।
बिहिबारको छलफलमा ओली आफ्नो अडानमा लचिलो बनेपछि अब सभामुख चयनमा नेकपाभित्र सहमति नजिक छलफल चलिरहेको छ ।

खासगरी सभामुखमा ओलीले आफ्नो अडान लिइरहँदा प्रचण्डले यो विषयलाई सचिवालय, स्थायी समिति र आवश्यक परे केन्द्रीय समितिमा समेत लैजाने बताएपछि ओली लचक बनेका हुन् । अहिलेकै समिकरणमा रहने हो भने आली यी तिनवटै पार्टी निकायमा अल्पमतमा पर्नेछन् । २३ पुसमा प्रस्तावित उपाध्यक्ष वामदेव गौतम निवासमा बसेको सचिवालय सदस्यहरुको बैठकले प्रचण्डले प्रस्ताव गर्ने सभामुखमा साथ दिने निश्र्कष निकालेपछि ओलीलाई आफ्नो अडानबाट पछि हटन दवाव बढेको थियो ।

हिजो बालुवाटारमा ओली निकट नेताहरु इश्वर पोखरेल, विष्णु पौडेल र सुवास नेम्वाङबीचको छलफलमा पनि ओलीलाई आफू पार्टीमा पर्न सक्ने अल्पमतका विषयमा छलफल भएको थियो । महासचिव पौडेलले अल्पमतमा परेर आफू कमजोर बनेको सन्देश दिन नहुने भन्दै सभामुखमा लचिलो बन्न सुझाव दिएका थिए ।

त्यही आधारमा ओली प्रचण्डलाई सभामुख प्रस्ताव गर्न दिन तयार भएका हुन् । सभामुख चयनमा अब प्रचण्ड हावी भए सभामुख को ? यस बारेमा भने प्रचण्डले आज मात्र ओलीसँगको छलफलमा नाम अगाडि सार्ने स्रोतले बतायो ।

सभामुखमा पूर्व माओवादी तर्फबाट अग्नि सापकोटा, देव गुरुङ, पम्फा भुषाल लगायतको नाम चर्चामा छ । तर यी नामबाहके अन्य नामका विषयमा पनि छलफल हुन सक्ने सम्भावना रहेको स्रोतले बतायो । यसो हुँदा हरिवोल गजुरेल, जर्नादन शर्मा र टोपबहादुर रायमाझीका नाममा पनि छलफल हुन सक्ने सम्भावना उत्तिकै रहेको पूर्व माओवादी धारका नेताहरुको भनाई छ ।