Safal Khabar - हुण्डीको कारोबारमा संलग्न एजुकेशन कन्सल्टेन्सीलाई कारबाहीको तयारी
बुधबार, ०६ कार्तिक २०७६ (Wednesday, 23 October, 2019)
हुण्डीको कारोबारमा संलग्न एजुकेशन कन्सल्टेन्सीलाई कारबाहीको तयारी
कन्सल्टेन्सीले कम कमाएको भन्दै कर थोरै तिर्ने सञ्चालकहरु चढ्छन् महँगा गाडी
आइतबार, १२ असोज २०७६, १३ : १९
हुण्डीको कारोबारमा संलग्न एजुकेशन कन्सल्टेन्सीलाई कारबाहीको तयारी

काठमाडौं । केही शैक्षिक परामर्श संस्थाका सञ्चालकहरुले गैरकानूनी तवरले पैसा कमाएको पाइएपछि सम्पत्ति शुद्धिकरण विभागले ती संस्थाका सञ्चालकहरुलाई कारबाहीको दायरामा ल्याउने भएको छ । 
विभागका अनुसार पछिल्लो समयमा धेरै कारोबार हुने क्षेत्रमा एजुकेशन कन्सल्टेन्सीहरु पनि देखिएको र कन्सल्टेन्सी सञ्चालकहरु हुण्डीको कारोबारमा संलग्न भएकाले उनीहरुमाथि छानबिन थालिएको जनाएको छ । 
हुण्डी तथा अनधिकृत रुपमा कारोबार गर्नेमा एजुकेशन कन्सल्टेन्सीका सञ्चालकहरु पनि देखिएको विभागले जनाएको छ । ‘एजुकेशन कन्सल्टेन्सीका नाममा अनाधिकृत धन्दा चलाएको पाइएपछि उनीहरुलाई कानूनी दायरामा ल्याउन छानबिनको प्रक्रिया सुरु गरिएको हो’ विभागका एक उच्च अधिकारीले भने । ती अधिकारीका अनुसार, धेरै उजुरी परेपछि उनीहरुमाथि छानबिन शुरु गरिएको हो । 
अनाधिकृत रुपमा पैसा कमाउनेका नेकपाका नेता राजेन्द्र पाण्डेका छोरा प्रकाश पाण्डे समेत रहेको स्रोतको दाबी छ । कन्सल्टेन्सीले कम कमाएको भन्दै कर थोरै तिर्ने तर सञ्चालकहरु महंगा गाडी चढेर हिँड्ने अस्वाभाविक गतिविधि देखिएको पाइएको छ । कन्सल्टेन्सीहरुले कर छलेर ठूलो मात्रामा रकम विदेश पठाएको भन्दै सयौं उजुरी परेको विभागले जनाएको छ । 
विद्यार्थीहरुसँग सेवा शुल्कका नाममा चर्को शुल्क लिने, विदेशबाट आएको कमिसनको कर भने नतिरेको पाइएको छ । छोटो समयमा अकूत सम्पत्ति कमाएको देखिएकाले त्यसबारेमा विभागले अनुसन्धान अगाडि बढाएको ती अधिकारीको भनाइ छ । कन्सल्टेन्सीले वार्षिक रु ४० अर्ब रुपैयाँ विदेश पठाइरहेको छ । 
अनुसन्धानमा उपत्यकामा सञ्चालनमा रहेका अधिकांश र बाहिरका केही कन्सल्टेन्सीहरु छन, त्यसमध्ये पनि बढी सम्पत्ति कमाएका एक दर्जन कन्सल्टेन्सी विशेष अनुसन्धानमा परेको स्रोतको दाबी छ । यस्ता कन्सल्टेन्सीहरुले कारोबार स्वदेश र विदेशमा गर्नुपर्ने भएकाले पैसा ल्याउने र लैजाने प्रक्रिया र विद्यार्थीसँग लिने शुल्कमा पारदर्शिता समेत नदेखिएको विभागको भनाइ छ । 
पछिल्ला दिनमा अष्ट्रेलियास्थित एआईबीटी कलेजमा अध्ययन गर्न जाने नेपाली विद्यार्थी बिचल्लीमा परेपछि कन्सल्टेन्सी क्षेत्रका अधिकांश कन्सल्टेन्सीहरुको सम्पूर्ण विवरण शिक्षा मन्त्रालयले माग गरेको थियो । त्यसपछि कर कार्यालयले समेत उनीहरुको सम्पूर्ण कागजपत्र लगेर अनुसन्धान गरेको थियो । तर उनीहरुलाई कमजोर प्रमाण पेश गरेर छुट दिइएको थियो । अब भने विभागले उनीहरुलाई तह लगाएरै छाड्ने तयारीमा जुटेको छ ।

प्रतिक्रिया दिनुहोस